Myrzataı Joldasbekov 100 jańa oqýlyqty aýdarýǵa qatysady

ASTANA. QazAqparat - Memleket jáne qoǵam qaıratkeri, kórnekti ǵalym Myrzataı Joldasbekov «Jańa gýmanıtarlyq bilim: qazaq tilindegi 100 oqýlyq» jobasynyń redaktsııalyq alqasyna múshe boldy, dep habarlaıdy QazAqparat tilshisi.

"Shyntýaıtyna kelgende, 100 jańa oqýlyq aýdarmasyna bizdiń keleshek urpaq muqtaj bolyp otyr. Jasyratyny joq, qazir óz elimizde, qazaq tilinde shyqqan oqýlyqtardyń kóbine jurt narazy, sapasyna kóńilderi tolmaıdy. Osyny eskere otyryp jáne dúnıejúzi halyqtarynyń ıntegratsııasy kúsheıgen zamanda álemniń bedeldi oqý oryndarynyń rýhanııat salasyndaǵy tańdaýly oqýlyqtaryn qazaq tiline aýdarý - óte ıgilikti jumys. Jalpy, bizdiń balalar - daryndy, talantty balalar. Álemniń túpkir-túpkirinde bolǵan baıqaýlardan báıgeni sýyryp ákelgenderin jıi oqımyn. Onyń ústine, mynadaı sapaly aýdarmamen balalardyń bilimi tolyǵa túsedi», - dedi M.Joldasbekov Astanada ótken «Jańǵyrý 3.0: Rýhanı jańǵyrý» konferentsııasynda. 

Akademık aýdarma jaýapkershiliginiń salmaqty ekenin, onyń sapasyna mán berýdi jáne oqýlyqtardyń qazaq uǵymyna sińisti bolý kerektigin basa aıtty.

«Bizdiń tilegimiz de osy, jańa oqýlyqtar qazaq tiline, qazaq uǵymyna sińisti bolýy kerek. Oqýlyqtardy aýdaryp, ábden elekten ótkizgen soń, bizdiń qolymyzǵa berse, naǵyz ádebı tilge, urpaq túsinedi-aý degen qanyqty tilge yńǵaılap bere alamyz», - dedi M.Joldasbekov.

Aıta keteıik , Astanada «Jańǵyrý 3.0: Rýhanı jańǵyrý» halyqaralyq ǵylymı-praktıkalyq konferentsııasy ótip jatyr.  Onda «Jańa gýmanıtarlyq bilim: qazaq tilindegi 100 oqýlyq» jobasy men qoǵamdyq sanany jańǵyrtýdyń tujyrymdamalyq máseleleri talqylanýda.