Myrzashól qaıtadan shólge aınalmaýy úshin tıisti sharalar atqarý qajet - R. Halmuradov
ASTANA. Qyrkúıektiń 22-si. QazAqparat /Qanat Mámetqazyuly/ - Búgin Parlament Májilisiniń jalpy otyrysynda depýtat Rozaqul Halmuradov QR Premer-Mınıstri Kárim Másimovtyń atyna saýal joldady. Onda depýtat Maqtaaral aýdanyndaǵy aýyl sharýashylyǵy úshin paıdalanylatyn jerlerdiń tozý, búliný jaǵdaıyna alańdaýshylyq bildirdi.
Depýtattyń aıtýynsha, Maqtaaral aýdany Qazaqstandaǵy halqy sany jaǵynan eń úlken aýdandardyń biri, onda 300 myńǵa jýyq adam turady. Al sonshama jurttyń birden-bir kúnkórisi - sýarmaly jerden mańdaı terimen alǵan ónimi. Aýdanda elimizdegi eksportqa shyǵarylatyn aýyl sharýashylyq ónimderiniń ishinde bıdaıdan keıin maqta óndiriledi.
«Keńes ókimeti ýaqytynda aýdandaǵy sýarmaly jerlerdiń melıoratıvtik jaǵdaıyn jaqsartý, jer asty tuzdy sýlardyń bir deńgeıde bolýyn qamtamasyz etý maqsatynda tik drenajdy uńǵymalar (842) qurylyp, olar turaqty jumys istep turǵan. Ókinishke qaraı, qazir bul uńǵymalar isten shyǵyp, olardy qaıta qalpyna keltirýge qarjy tapshy bolyp tur. Sonyń saldarynan egistik jerler qunarsyzdanyp, tuzdanýy oryn alýda», dedi depýtat. Onyń aıtýynsha, biraz jyl buryn Dúnıejúzilik Damý Banki men Azııa Damý Banki arqyly nesıe esebinen 218 tik drenajdy uńǵymalar qalpyna keltirilgen. Degenmen, bularǵa da 2001 jyldan beri iske qosylmaı, tıisti kútip-baqylaý jumystary júrgizilmegen. Sonyń saldarynan keıin iske qosylǵan uńǵymalar da qaıtadan jumysqa jaramsyz bolyp otyr. «Aýdandaǵy barlyq tik drenajdy uńǵymalarda kezeń-kezeńmen kúrdeli jóndeý jáne qalpyna keltirý jumystary júrgizilý jospary qarastyrylsa eken. Bul boıynsha 2011-2013 jyldarǵa arnalǵan respýblıkalyq bıýdjet esebinen atalǵan jobalarǵa 4 mlrd. 912 mln. teńge qarjy bólingeni jón. Áıtpese, bir kezderi Myrzashól dep atalǵan bul óńirde aýdandaǵy tik drenajdy uńǵymalar, qashyrtqy júıeler iske qosylmasa, qaıtadan shólge aınalý qaýpi bar», dedi R. Halmuradov.
