Myrzalın aqmolalyq olımpıadashylarǵa sáttilik tiledi

KÓKShETAÝ. QazAqparat - Aqmola oblys ákimi Málik Myrzalınniń tikeleı tapsyrmasymen Almaty qalasyndaǵy AIBA boks akademııasynda Ońtústik Koreıanyń Phenchhan qalasynda ótetin XXIII qysqy olımpıada oıyndarynda baratyn respýblıka ulttyq quramasy sapyndaǵy aqmolalyq sportshylardyń qatysýymen baspasóz máslıhaty ótti, dep habarlaıdy «QazAqparat» tilshisi Aqmola oblystyq dene shynyqtyrý jáne sport basqarmasynyń baspasóz qyzmetine silteme jasap.

Sharaǵa oblystyq dene shynyqtyrý jáne sport basqarmasynyń basshysy Nadejda Patıýtkına men sportshylardyń jankúıerleri jáne buqaralyq aqparat quraldarynyń ókilderi qatysty. Nadejda Patıýtkına oblys basshysy Málik Myrzalınniń jedelhatyn oqyp berdi. Onda «Sizderge shynaıy sporttyq jetistik, joǵary kórsetkish jáne úlken jeńis tileımin. Biz sizderge senemiz!», - dep jazylǵan jedelhatta.

Baspasóz máslıhaty barysynda sportshylar ózderiniń dúbirli doda aldyndaǵy kóńil-kúıderi men daıyndyqtary jóninde aıtyp berdi.

«Shynymen de, el namysy ortaǵa salynatyn jarysta jankúıerlerimizdiń jyly sózderi men shynaıy tilekteri biz úshin mańyzdy. Bizder úshin búkil respýblıka, onyń ishinde Aqmola oblysy halqynyń qoldaý bildirip otyrǵany belgili. Sondyqtan, namysty qoldan bermeýge tyrysamyz», - dedi bıatlonnan ulttyq quramanyń bas jattyqtyrýshysy Valerıı Polhovskıı óz sózinde.

Baspasóz máslıhatynda aıtylǵandaı, baıraqty jarys 9-25 aqpan aralyǵynda ótedi. Onda álemniń 92 elinen jınalǵan 2 500 atlet qysqy sporttyń 15 túri boıynsha 102 jıyntyq medaldi sarapqa salady. Qazaqstandyq sportshylar irikteý báseksesinde utyp alǵan 57 olımpıada joldamasyna sáıkes sporttyń 9 túri boıynsha synǵa túspekshi. Qazaqstan Respýblıkasy ulttyq quramasy sapynda aqmolalyq 6 sportshy el namysyn qorǵaıtyn bolady. Olardyń arasynda bıatlonshy Alına Raıkova, Roman Eremın, Tımýr Hamıtgatın jáne shańǵyshylar Evgenıı Velıchko, Valerııa Tıýleneva, Denıs Volotka bar.