Myrzalın aqmolalyq qyz-kelinshekterdi merekemen quttyqtady
KÓKShETAÝ. QazAqparat - Aqmola oblysynyń ákimi Málik Myrzalın 8 naýryz - Halyqaralyq áıelder kúni qarsańynda óńirdegi názik jandarmen kezdesip, merekelerimen quttyqtady, dep habarlaıdy QazAqparat tilshisi.
Kezdesýde aımaq basshysy qazirgi zamandaǵy áıelderdiń qoǵamdaǵy, elimizdiń táýelsizdiginiń qalyptasýy men nyǵaıýyndaǵy róline toqtaldy.
«Áıel men kóktem - tirshiliktiń bastaýy, mahabbat pen náziktikti bildiredi. Kóktem sekildi áıelder de adamzatqa ómir, jylýlyq pen ásemdik syılaıdy. Memleket basshysy áıelderdiń memlekettik jáne qoǵamdyq isterdegi rólin aıtqan kezde, «áıel shańyraqtyń uıytqysy ǵana emes, memlekettik ómirdiń qatysýshy» dep birneshe ret atap ótken bolatyn», - dep atap ótti Málik Myrzalın.
Sonymen qatar, óńir basshysy elimizde erlermen qatar santúrli salada jumys istep kele jatqan áıelderdi erekshe atap ótip, oblystyń áleýmettik-ekonomıkalyq salasyn damytýda, qoǵamdyq-saıası ómirdi jandandyrýda, otbasyn nyǵaıtýda, jastardy tárbıeleýde áıelderdiń róli orasan zor ekenin aıtyp, olardyń eńbegine alǵysyn jetkizdi.
Atap ótý kerek, óńirde bıyl QR Prezıdenti Jarlyǵymen 21 kópbalaly ana altyn jáne kúmis alqa tósbelgisine ıe boldy. Memleket basshysy atynan kópbalaly 12 anany aımaq basshysy Málik Myrzalın marapattady. Sondaı-aq aımaqta túrli salany damytýǵa úles qosqan birqatar áıel oblys ákiminiń alǵyshatymen marapattaldy.
Marapattalǵandardyń arasynda Aqkól aýdanynan kelgen kópbalaly ana Palsara Nurjanova óziniń aq batasyn berdi.
«Men 11 balany dúnıege ákelip, tárbıelep otyrmyn. Búgingi kúni 74 nemere jáne shóberelerimniń qyzyq, qýanyshyna bólenip otyrmyn. Men óte baqyttymyn. Aspanymyz ashyq bolyp, halqymyz árqashan beıbitshilik pen tatýlyqta ómir súrýge jazsyn!», - dedi ol.
Sonymen qatar, Sandyqtaý aýdanynyń turǵyny, «Mıras» balabaqshasynyń tárbıelenýshisi Marına Anosova da óziniń júrekjardy tilegin arnady.
«Memleket basshysy bastaǵan el úkimetiniń kópbalaly otbasylarǵa áleýmettik kómekti nyǵaıtý boıynsha sharalardy qolǵa alyp otyrǵandyǵy qýantady. Kópbalaly otbasylarǵa kómek kórsetýde naqtyly sandar aıtyldy, bul olardyń máselesin sheshýge septigin tıgetini sózsiz. Kópbalaly otbasy - bul eń aldymen, elimizdiń keleshek urpaǵyn, bilimdi, mádenıetti qazaqstandyqtardy tárbıeleıtin áıel - ana», - dep atap ótti pedagog.
Saltanatty shara merekelik kontsertke ulasty.
