Myrzahmetov: Memlekettik baǵdarlama aýyldyń árbir turǵynyna qoljetimdi bolmaq

ASTANA. QazAqparat - Asqar Myrzahmetov Aqtóbe oblysyndaǵy AÓK-ti damytý týraly memlekettik baǵdarlamasynyń tujyrymdamasyn túsindirý barysynda sýbsıdııalaýdyń tıimdiligin arttyrý sharalary týraly aıtty, dep habarlaıdy Aýyl sharýashylyǵy mınıstrliginiń baspasóz qyzmeti.

A. Myrzahmetov sýbsıdııalaý júıesine birqatar túzetýler engizý josparlanǵanyn aıta ketti.

«Qazirgi tańda mal sharýashylyǵyn sýbsıdııalaýdyń 33 baǵyty bar, osy baǵyttarǵa 2015 jyly 69 mlrd. teńge bólindi. Al, jańa baǵdarlama aıasynda sýbsıdııanyń 6 túri boıynsha 34,5 mlrd. teńge qarastyrylǵan.

 Sút, sıyr eti, qoı eti ónimderin óndirýge beriletin sýbsıdııany iri sharýashylyqtar ǵana (jalpy ónimniń 60%),  alyp otyr, mysaly, sıyr eti boıynsha 19 bordaqylaý alańy ǵana (3000 mal ornynan bastap)  sýbsıdııa alǵan, mundaı jaǵdaı sút ónimderine berilgen sýbsıdııada da kezdesedi», - dep atap ótti ol.

«Kórsetilgen baǵyttar boıynsha qoıylatyn talaptar tómendetildi, (sıyr eti boıynsha  400-den 100 mal ornyna deıin) jáne aýyl sharýashylyǵy kooperatıvterine sýbsıdııa bólý múmkindigi qarastyrylyp otyr. Jańa baǵdarlama boıynsha sýbsıdııa alatyndar sany 2,5 esege kóbeıedi»,- dedi vıtse-premer.

Asyl tuqymdy tól basynyń jetkilikti bolýyna baılanysty, shet elden kelgen asyl tuqymdy iri-qaraǵa sýbsıdııa bólinbeıdi. Olar ónimderdi sýbsıdııalaýǵa beriledi.

«Nátıje bermeıtin mal basyna beriletin sýbsıdııalaý toqtatylyp,  ornyna aýyl sharýashylyǵy kooperatıvteriniń qurama azyǵyna sýbsıdııa beriledi,- dep aıta ketti Premer-mınıstrdiń orynbasary - Aýyl sharýashylyǵy mınıstri.