Myrzahmetov Qaraǵandy, Pavlodar jáne ShQO sharýalarymen baılanys arqyly keńes ótkizdi

AÓK-ti damytýdyń 2017-2021 jyldarǵa arnalǵan memlekettik baǵdarlamasynyń  tujyrymdamasyn Elbasy maquldaǵannan keıin, Májilis pen Úkimette qaralǵan bolatyn. Sonymen qatar,  jańa baǵdarlamanyń jobasyn talqylaý jáne taldaý maqsatynda vedomstvo basshysy Ońtústik, Batys jáne Soltústik óńiriniń taýar óndirýshilermen kezdesýler ótkizdi. Endi qalǵan úsh óńirdiń oblys ákimderiniń orynbasarlarymen, taýaróndirýshiler jáne salalyq odaq ókilderimen pikir almasyp, usynystaryn tyńdady.

AÓK-tiń jańa rólin júzege asyrý elimizdiń turaqty damýyn, eńbek ónimdiligin arttyrady jáne halyqtyń kópshilik bóliginiń ómir súrý deńgeıin kóterýdi qamtamasyz etpek. Bul mindetterge aýqymdy túrde kooperatsııalardy damytý arqyly jetýge bolady.

2021 jylǵa qaraı 500 myńǵa jýyq JQSh men usaq sharýa qojalyqtardy tartýdy josparlap, 1 200-ge jýyq aýyl sharýashylyǵy kooperatsııalary qurylady.

Sonymen qatar, kooperatıvter ózderiniń úleskerlerine, ıaǵnı qosalqy sharýashylyq pen usaq sharýa qojalyqtaryna veterınarlyq, agrohımııalyq, tehnıkalyq qyzmet kórsetý jáne jem daıyndaý boıynsha birneshe qyzmetter kórsete alady. Mysaly, aýyl turǵyndarynyń maly úshin shóp qajet boldy delik. Óziniń quny tonnasyna 7-8 myń teńge bolatyn shóp, jazǵy ýaqytta 20 myń teńgege, kúzde 30 myń teńge, qysta 40 myń teńgege deıin qymbattaıdy. Al, kooperatıv memlekettiń qoldaýymen lızıng arqyly satyp alynǵan traktor, shóp shabatyn mashına, tirkemelerdi paıdalanyp, arzan baǵamen shóppen qamtamasyz ete alady. Bir sózben aıtqanda, kooperatıvter JQSh jáne damytýǵa arnalǵan negizgi máselelerdi sheship beredi.

Sondaı-aq, kooperatıv aýyl turǵyndaryn jem-shóp tsehy arqyly bir ortalyqtan qurama azyqpen qamtamasyz etedi. Kooperatsııanyń taǵy bir artyqshylyǵy - aýyl turǵyndaryna shaǵyn nesıe alýǵa múmkindik bermek..

Memlekettik baǵdarlama aıasynda egis alqaptaryn ártaraptandyrý jalǵastyrylatyn bolady. Bosatylǵan alqaptarǵa eksportqa suranysy joǵary arpa, suly, júgeri jáne maıly daqyldar egiledi.

Baǵdarlama aıasynda sýbsıdııa men nesıe alýshylar alýshylar sany 7 esege deıin ulǵaıyp, «KazAgro» arqyly jeńildikpen alatyndar sany 1,4 esege ósedi dep josparlanýda.

Mal sharýashylyǵy salasyndaǵy sýbsıdııalaý baǵyttarynyń tıimdiligin arttyrý qaıta qaralyp shyqty. Kooperatıvterdi qosa alǵanda óndiristiń usaq formalaryna beriletin sýbsıdııanyń tıimdiligin arttyrý úshin qoı eti men sıyr etine beriletin sýbsıdııalardy saralaý jumystary júrgizildi.

Sonymen qatar, selektsııalyq-asyl tuqymdandyrý jumystaryn sýbsıdııalaý mehanızmderi ózgertilip, naqty nátıjege baǵyttalatyn bolady. Mysaly, qoldanystaǵy sýbsıdııalaý júıesi boıynsha tek qana asyl tuqymdy ІQM analyǵy úshin sýbsıdııa berilse, (1 bas úshin 20 myń teńge) tólderine sýbsıdııa qarastyrylmady, al usynylyp otyrǵan júıe boıynsha bastapqy kórsetkishpen analyqqa 10 myń teńge jáne tóline 10 myńnan 20 myńǵa deıin sýbsıdııa qarastyrylǵan.

Ósimdik sharýashylyǵynda gektarlyq sýbsıdııalaýdan óndirilgen ónim kólemi boıynsha beriletin sýbsıdııalaý júıesine qaraı bet burylyp jatyr. Bıdaı, arpa jáne sulynyń 1 gektaryna beriletin sýbsıdııalaý júıesi alynyp tastalynady. Kóktemgi egistik jumystaryna beriletin nesıe jetildiriledi. Maıly daqyldar boıynsha gektarly sýbsıdııalaý alynyp tastalynyp, óndirýshi kásiporyndardyń júktemelik qýatyn arttyrý maqsatynda óndirilgen shıkizat kólemine baılanysty sýbsıdııa beriledi. Sonymen qatar, maqta, mal azyǵy daqyldary men kúrishke beriletin gektarlyq sýbsıdııa júıesinde ózgeris bolmaıdy.

1 teńge boıynsha sýbsıdııalaý 2 esege deıin, ıaǵnı 7,5 teńgeden 13 teńgege deıin kóbeıedi. Bul jalpy ónim óndirý úlesi 50%-ǵa artady degen sóz.