Myrzahmetov aýyz sýǵa bólinetin qarjynyń 180 mlrd teńgesin únemdeý jolyn aıtty
ASTANA. QazAqparat - Elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý barysynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov bólinetin qarjyny únemdeý jolyn aıtty, dep habarlaıdy QazAqparat.
Onyń sózine qaraǵanda, «Qazsýshar» kásipornyn magıstraldy sý qubyrlary jelisin ǵana emes sonymen qatar eldi mekenderdiń barlyq sý qubyrlary jelisin salý jáne jańǵyrtý barysynda biryńǵaı operator retinde aıqyndaý qajet. Óıtkeni, ol qajetti kadrlary, materıaldyq tehnıkalyq jáne jobalyq-ǵylymı bazasy bar elimizdegi jalǵyz uıym sanalady. Búginde onda 10 myńnan astam adam jumys isteıdi. Mamandandyrylǵan tehnıkalarynyń sany 1,5 myńǵa jetedi.
«Bul eń birinshiden, jumystardyń jalpy qunyn 717 mlrd teńgeden 536 mlrd teńgege azaıtýǵa, ekinshiden, jobanyń júzege asyrylý merzimin jyl saıyn josparlanyp otyrǵan qarjylandyrý kólemi saqtalǵan jaǵdaıda 2022 jyldyń sońyna deıin qysqartýǵa múmkindik beredi. Buǵan qosa, sý qubyrlary júıesin, ásirese, kommýnaldyq menshikte turǵan jáne aıtarlyqtaı materıaldyq-tehnıkalyq jabdyqtaýdy qajet etetin júıelerdi tıimdi paıdalaný máselesin sheshedi», - dedi mınıstr.
Asqar Myrzahmetovtiń paıymynsha, mundaı sheshim sapaly jobalyq-smetalyq qujattamalardy ázirleýdegi ózekti máselelerdi de sheshetin bolady.
«Ótken jyly bıýdjet qarajatyn tıimdi jumsaý maqsatynda múddeli memlekettik organdardyiń dáne oblys ákimdikteriniń qatysýymen jumys toby quryldy. Onyń mindetine sýmen jabdyqtaý nysanyn salý jáne qaıta jańǵyrtýdyń jobalyq-smetalyq qujattamasynyń shyǵystaryn ońtaılandyrý kirdi. Jumys toby aýyldy sýmen jabdyqtaýdyń 133 jobasy boıynsha 5 mlrd teńgeden astam shyǵysty ońtaılandyrdy», - dedi mınıstr.
