Myrzahmetov AÓK damytýdyń memlekettik baǵdarlamasynyń tujyrymdamasyn kásipkerlermen talqylady
Qujatty Aýyl sharýashylyǵy mınıstrligi «Atameken» UKP agroónerkásip kesheni, tamaq ónerkásibi jáne óńdeýshi ónerkásip komıtetteriniń otyrysynda nazarǵa usyndy. Jıynǵa bıznes ókilderi, salalyq odaqtar men kásipkerler qaýymdastyqtary qatysty.
QR Premer-mınıstriniń orynbasary - aýyl sharýashylyǵy mınıstri Asqar Myrzahmetov Agroónerkásip keshenin damytýdyń memlekettik baǵdarlamasynyń Tujyrymdamasyndaǵy maqsat-mindetter týraly aıtyp berdi. Ol, ásirese, memlekettik qoldaýdy ıelenetin agroónerkásip salalaryna, aýylsharýashylyq kooperatıvteri arqyly jeke qosalqy sharýashylyqtardy qoldaý tetikterine erekshe toqtalyp, eksporttyq saıasatty júzege asyrý men tabıǵı ónimderdiń qazaqstandyq brendin nasıhattaý boıynsha qolǵa alynatyn is-qımyldardy baıyptady.
«Baǵdarlamada kózdelgen maqsattardy júzege asyrýda aldymyzda alty mindet tur: bul mal sharýashylyǵynyń tıimdiligin 58%-ǵa, ósimdik sharýashylyǵyn 48%-ǵa kóterý, aýqymdy aýylsharýashylyq kooperatsııasyn damytý, aýylsharýashylyq taýarlaryn óndirýshilerin barynsha tıimdi ári qoljetimdi memlekettik qoldaýmen qamtamasyz etý, 600 myńnan astam sýarmaly jerdi aınalymǵa engizý jáne agroónerkásip keshenin memlekettik retteýdi jetildirý», - dep atap ótti A. Myrzahmetov.
Vıtse-premerdiń sózine qaraǵanda, aýyl sharýashylyǵyn damytýdyń memlekettik baǵdarlamasynda egistik alqaptardy ártaraptandyrý jalǵasyn tabady.
«Bıdaı alqaptary 2,3 mln gektarǵa qysqarady. Oǵan basty sebep, astyqtyń tym artyq óndirilýi. Bosaǵan jerlerge anaǵurlym zárýlik seziletin arpa, suly, maıly jáne ózge de ónimdiligi jaqsy daqyldar sebiletin bolady», - dedi A. Myrzahmetov.
Aýyl sharýashylyǵy mınıstriniń birinshi orynbasary Qaırat Aıtýǵanov ta jurtshylyqty jańa memlekettik baǵdarlama Tujyrymdamasyn talqylaýǵa belsendi qatysýǵa shaqyrdy.
«Baǵdarlamanyń maqsat-muratyn aıqyndaýda kelesi jaıttardy basty nazarda ustadyq: elimizdiń azyq-túlik naryǵyn qamtamasyz etý, maqsatty eksporttyq saıasat jáne aýyl halqynyń tabysyn arttyrý. Baǵdarlama Tujyrymdamasy Aýyl sharýashylyǵy mınıstrligi men áleýmettik jelidegi resmı paraqshada jarııalandy. Árkim Tujyrymdama astyna óz pikirin qaldyra alady. Barlyq pikir eskeriletin bolady», - dedi Q. Aıtýǵanov.
UKP basqarma tóraǵasynyń orynbasary Nurjan Áltaev atap ótkendeı, «Atameken» Agroónerkásip keshenin damytýdyń memlekettik baǵdarlamasynyń tujyrymdama jobasyn Aýyl sharýashylyǵy mınıstrligimen birlese otyryp qyzý talqylaýdan ótkizdi.
«Salalyq qaýymdastyqtar men odaqtardan túsken eskertýler men usynystar memlekettik baǵdarlamany jasaýshy tarapqa jiberildi. Agrobıznespen syndarly suhbat qurý maqsatynda, Facebook áleýmettik jelisinde «Atameken. Qazaqstandaǵy agrosuhbat» toby ashyldy. Kásipkerler barlyq qajetti aqparatty, sall-ortalyqtyń 8-800-080-80-10 nómirine qońyraý shalyp nemese agrodialog@palata.kz elektrondyq mekenjaıyna usynystardy jiberý arqyly ala alady. Mine, búgin de, birlese ári ashyq sıpatta sharýalarǵa arnalǵan jańa qujat Tujyrymdamasyn talqylaýǵa jınalyp otyrmyz. Bul qujat qandaı kúıde qabyldansa, onda qandaı qoldaý túrleri kórsetilse, aldaǵy bes jyldaǵy agroónerkásip kesheni solaı damıtyn bolady», - dep atap ótti N. Áltaev.
