Myrzageldi Kemeldiń «Aqyl qalta» kitaby Qytaıda jaryq kórdi
M.Kemeldiń tóte jazýdaǵy «Aqyl qalta» kitabyn baspaǵa daıyndaǵan, sol arqyly eki el arasyndaǵy rýhanı baılanystyń damýyna atsalysqan azamat - Shynjań ólkesiniń ortalyǵy Úrimshi qalasyndaǵy Shynjań halyq baspasynyń aǵa redaktory Simádil Shúkenuly.
Mine, endi Úrimshi qalasynan qýanyshty habar kelip otyr. Ony Shynjań halyq baspasynyń aǵa redaktory Simádil Shúkenulynyń ózi joldapty. Ol óz hatynda Qazaqstan Jazýshylar odaǵynyń múshesi, professor Myrzageldi Kemeldiń «Aqyl qalta» kitaby Qazaqstanda basylym kórgennen keıin, shetelde turatyn kózi qaraqty oqyrmandardyń suranysyna, izdep júrip oqıtyn kitabyna aınalǵanyn jazady.
«Sondyqtan bul kitapty tóte jazýmen shyǵarýdy josparladyq. Sol maqsatty oılastyra kele, bıylǵy jyly qazaq memleketiniń táýelsizdik kúnine oraı 1500 taralymmen basylyp shyqty jáne oqyrmandardyń alqaýly kitabyna aınalyp otyr»,-deıdi Simádil Shúkenuly.
Kitaptaǵy dúnıe halyqtarynan shyqqan oıshyl danyshpandardyń, kemeńgerlerdiń, adamzat aqyl-oıynyń jaýharlary jınaqtalyp, suryptalyp, adam tárbıesine, izgilik qasıetterine jeteleıtin unamdy tustary bul týyndynyń úlken suranysqa ıe bolýyna jáne baspadan shyǵýyna tikeleı sebep bolǵan.
Simádil Shúkenuly óz hatyn: «Jahandaný úrdisindegi mádenıetti qalaı túsiný, ult mádenıetin, dástúrin qalaı saqtap qalý jaıynda mundaǵy qazaq oqyrmandaryna jol nusqaıtyn «Aqyl qalta» kitaby ár qazaqtyń úıinde bolýǵa tıisti kitap. Avtorǵa kitapty tóte jazýmen shyǵaryp, órisin keńitýge bergen kelisimi úshin rahmet aıta otyryp, oıǵa alǵan ıgilikti isimizdiń oryndalǵanyn qýana habarlaımyz. Bul bizdiń táýelsizdik merekesine qosqan úlesimiz! Quttyqtaımyz!»,- dep Qazaq eline degen ystyq sálemimen jáne quttyqtaýymen aıaqtapty.