Myrzaǵalıev munaı-gaz sharýashylyǵyndaǵy ekologııalyq problemalar týraly aıtty
Shara barysynda mınıstr respýblıkadaǵy munaı-gaz sharýashylyǵyndaǵy negizgi ekologııalyq problemalardy, sondaı-aq olardy tómendetý jospary týraly baıandady. Keńeske Qazaqstan Prezıdenti Qasym-Jomart Toqaev ta qatysty.
Máselen, mınıstr M. Myrzaǵalıevtiń aıtýynsha, negizgi ekologııalyq problemanyń biri – Mańǵystaý oblysyndaǵy edáýir jınaqtalyp qalǵan munaı qaldyǵy.
«Bul problema ondaǵan jyl boıy sheshilmeı keledi. Osydan úsh apta buryn mınıstrlik pen QazMunaıgaz arasynda memorandýmǵa qol qoıylyp, oǵan sáıkes, QazMunaıGaz qaldyqtardy 2030 jylǵa deıin qaıta óńdeýge mindetteldi», - dedi Ekologııa mınıstri.
Kókjıde ken ornyndaǵy jerasty sýlaryn lastaýǵa jol bermeý – mınıstrlik moınyndaǵy taǵy bir problema.
«Kókjıde kenorny – biregeı joba. Ol batys óńirdegi halyqtyń qajettiligin óteı alady. 1983 jyldyń ózinde-aq mundaǵy táýliktik sý qorynyń mólsheri 196 myń m3 ekeni tujyrymdalǵan. Qazirgi ýaqytta ken orny aýmaǵynda 8 kómirsýtek shıkizatyn óndirýshi qarqyndy jumys isteýde. Aýyz sýdyń tamasha kózin lastap alý qateri bar», - dedi mınıstr.
Osyǵan oraı, Úkimet Kókjıjeni zertteýge qarjy bólip otyr.
M.Myrzaǵalıevtiń aıtýynsha, úsh jyl ishinde jerasty sý qoryn baǵalaý júrgizilip, ken ornynyń sulbasy naqtylanady, ekologııalyq aýyrtpalyq ta esepteledi.
«Mınıstrlik sondaı-aq munaı operatsııalaryn baqylaý men monıtorıngileýdi kúsheıtedi», dedi ol.
Taǵy bir ekologııalyq mindet – aınalymdy sýmen qamtamasyz etý.
«Munaı kompanııalarynyń ortasha aınalymdy sýmen qamtamasyz etý deńgeıi 30-40%. Biz 2025 jylǵa qaraı bul kórsetkishti 70%-ke jetkizý maqsatyn qoıyp otyrmyz», - dedi mınıstr.
«Sizdiń tapsyrmańyz boıynsha osy jáne ózge de ekologııalyq máselelerdi sheshý úshin jańa ekologııalyq kodeks ázirlenip jatyr. Qazirgi ýaqytta ol jurtshylyq arasynda talqylanýda. Jyl sońynda ony Parlamentke engizemiz», - dedi mınıstr.
