Myrzaǵalıev ekologııalyq týrızmdi damytatyn naqty usynystar ázirleýge 10 kún ýaqyt berdi
«Sońǵy jyldary biz erekshe qorǵalatyn tabıǵı aýmaqtar sanyn edáýir ósirdik. Eldiń týrıstik sektoryn damytýǵa kúsh jumsaıtyn ýaqyt keldi. Ekologııalyq týrızmdi damytý úshin jumysqa bıznes ókilderin tartý qajet. Orman sharýashylyǵy komıteti ulttyq parkterdiń ekologııalyq týrızmin damytý úshin jaǵdaı jasaýy tıis. Ol úshin 10 kún ishinde naqty usynystar berýdi tapsyramyn», - dedi mınıstr
Sonymen qatar Maǵzum Myrzaǵalıev Memleket basshysynyń Qaraǵandy oblysynda «Ulytaý» ulttyq parkin qurý jónindegi tapsyrmasyn merziminde oryndaý qajettigin basa aıtty.
«Erlan Nuralyuly, osy máseleni erekshe baqylaýǵa alýdy suraımyn. Osy jyldyń sońyna deıin bul jumysty bitirý kerek»,- dedi ol.
Mınıstr balyq sharýashylyǵyn damytý da - mańyzdy másele ekenine toqtaldy.
«Áleýeti zor. Birqatar ótkir máseleler bar. Olar: balyq ónimderiniń kóleńkeli aınalymy, brakonerlik, orman sharýashylyǵy men janýarlar dúnıesiniń aýmaqtyq bólimshelerin materıaldyq-tehnıkalyq qamtamasyz etýdiń nasharlyǵy, tyıym salynǵan aýlaý quraldaryn, onyń ishinde sıntetıkalyq buıymdardy paıdalaný men satý. Osyǵan baılanysty Orman sharýashylyǵy komıteti ázirlep jatqan «Balyq sharýashylyǵyn uzaqmerzimdi damytýdyń 2030 jylǵa deıingi baǵdarlamasynda» balyq aýlaý men ósirý kólemin ulǵaıtý jónindegi maqsatty ındıkatorlardy belgileı otyryp, problemalyq máselelerdi sheshý kórinis tabýy tıis», - dedi Maǵzum Myrzaǵalıev.
