Myrzaǵalı Aıtjanov: Jerebe bolmaı, qarsylastar týraly aıtý erte

ASTANA. QazAqparat -  Bokstan Qazaqstan Ulttyq quramasynyń bas bapkeri Djakartadaǵy jattyǵýlary týraly aıtyp berdi,  dep habarlaıdy QazAqparat tilshisi.

- Myrzaǵalı Qulanuly, Djakartanyń aýa raıyna úılesip jatyrsyzdar ma?

- Iá, boksshylar aýa raıyna beıimdelip qaldy. Negizi, boksshylardyń jarysy 24 tamyzda bastalady. Biz Djakartaǵa eki túrli sebeppen erte keldik. Birinshisi, osy jaqtyń aýa raıyna beıimdelý. Al ekinshisi Azıadanyń ashylý saltanatyna qatysý. Sebebi, ashylý rásiminde Qazaqstannyń baıraǵyn bizdiń boksshymyz Ábilhan Amanqul alyp shyǵatyn boldy. Mine, osyndaı sebepterge baılanysty erte kelýge týra keldi.

- Jattyǵatyn ortalaryńyz, jatatyn qonaqúılerińiz, iship-jeıtin tamaqtaryńyz qalaı? Kóńilderińizge unap jatyr ma?

- Munda kelgen barlyq sportshylarǵa birdeı jaǵdaı jasalǵan. Bir eldiń sportshylaryna jaıly, bir eldiń sportshylaryna jaısyz qyzmet kórsetý degen joq. Jalpy, jarysty uıymdastyrý qyzmeti kóńilimizden shyqty. Tamaqtary da unady.

- Básekede qaı eldiń boksshylary basty qarsylas bolýy múmkin?

- Buıyrsa, tamyzdyń 23 kúni jerebe tartylady. Jerebeden keıin baryp kimderdiń qarsylas bolatynyn biletin bolamyz. Ázirge, qarsylastar týraly aıtý erterek.

- Jalpy, jarysqa daıyndyqtaryńyz qalaı bolyp jatyr?

- Daıyndyǵymyz óte keremet. Boksshylar da kóterińki kóńil-kúıde júr. Eń bastysy, jeńiske degen senim men úmit bar. Bizden jeńis kútińizder, jeńisti kúnderde jolyǵaıyq.

- Áńgimeńizge rahmet!