Myrzaǵalı Aıtjanov ulttyq quramanyń 2019 jylǵy basty josparlaryn atady
«Jyl bizge óte qıyn boldy. Sebebi, alǵa qoıǵan maqsattarǵa jete almadyq. Basynda aıtyp ketkendeı (QBF otyrysynda - avt.), óte nashar kórsetkish boldy. Biraq, jigitterdiń barlyǵy úlken jetistikke jetemiz dep ter tókti. Jyl boıy daıyndaldy. Azııa oıyndarynda da jarysta qoldan eshkim jeńisti bergen joq. Biraq, keıbir kedergiler boldy. Ony endi biz qaıtalap, bireýge kiná taqpaımyz, ózimizden izdeımiz. Jigitterimiz bir bas emes, eki bas joǵary qylyp, jeńiske daıyndaımyz», - dedi Myrzaǵalı Aıtjanov Astanada ótken Qazaqstan boks federatsııasynyń otyrysynda.
Bas bapkerdiń aıtýynsha, boks federatsııasy men Mádenıet jáne sport mınıstrligi tarapynan barlyq jaǵdaı jasalǵanyn atap ótti.
«Jyl boıy eshqandaı oqý-jattyǵý jıyny, jarystar - barlyǵyna qatysyp, keshendi ǵylymı toppen birlese josparymyzdy quryp, kerekti jańalyqtardy engizip, kerek adamdarǵa jaraqaty bolsa emdetip, barlyq jaǵdaı jasaldy. Sol sebepti tek alǵysymyzdy aıtamyz. Bıylǵy jyly alǵa qoıǵan maqsattar oryndalmaǵandyqtan, búkil jankúıerlerden, basshylardan keshirim suraımyz. Biraq, barlyq nárse qolda bola bermeıdi eken. Sol sebepten biz jigitterdi jigerlendirip, 2019 jyly jaqsy daıyndalý maqsatynda Qazaqstan chempıonatyn Mańǵystaý oblysynyń Aqtaý qalasynda ótkizdik. Qazaqstan chempıonatyna qýanarlyǵy - 18-20 jas aralyǵyndaǵy jas boksshylar óte kóp boldy. Ataqty boksshylarmen olar qaımyqpaı jaqsy óner kórsetip jatyr. Komandanyń kóshbasshylary - Qaırat Eralıev, Aslanbek Shymbergenov, Abylaıhan Júsipov, Ábilqan Amanqul, Vasılıı Levıt, Qamshybek Qońqabaev óz oryndaryn saqtap qaldy», - dedi ol.
Myrzaǵalı Aıtjanovtyń aıtýynsha, odan bólek eki-úsh jigit chempıon atanǵan.
«Jalpy, ulttyq quramada myqty, sheberligi shyńdalǵan kóshbasshy bokshsylarǵa boksshylarǵa jastar da qosylyp jatyr. Bıylǵy Azııa, Álem chempıonattarynan keıin jastar quramasynan bes boksshyny ulttyq quramaǵa aldyq. Qazirgi tańda ulttyq quramada qyryq boksshy bar. Bıyl Konfederatsııa Kýbogynyń jartylaı fınaly men fınaly ótedi. Odan bólek, Saryaǵashta ulttyq quramanyń eki quramy emdelýge barady. Sonymen jylymyz bitedi. 2019 jyl - óte jaýapty jyl. Kelesi jyly Azııa men Álem chempıonaty bar. Azııa chempıonatynda Álem chempıonatyna joldamalar beriledi. Qazirgi tańda AІVA-nyń áli kúntizbesinde joq. Maýsym-shilde aılarynda dep kórsetilip tur. Biraq, naqty kúntizbede qaıda jáne qashan bolatyny áli qoıylǵan joq. Biraq, jyldyń basynan bastap birlesken oqý-jattyǵý jumystaryn ótkizemiz. Ózimizge aqpan aıynda Belarýs, Qytaı komandalary kelemiz dep jatyr. Naýryz aıynda biz Reseı quramasymen birlesken oqý-jattyǵý jıyndaryn ótkizemiz. AQSh, Ulybrıtanııa quramalarymen Prezıdent Kýbogy aldynda taǵy bir oqý-jattyǵý jıyny bolady», - dedi Myrzaǵalı Aıtjanov.
Bas bapker kelesi jylǵy Azııa chempıonatynda jáne Álem chempıonatynda da ulttyq qurama 8 salmaq bolǵan jaǵdaıda 2 altyn, 10 salmaq bolǵan jaǵdaıda 3 altyn alýǵa tyrysatynyn bildirdi.
«Lıtsenzııa jyly bolǵandyqtan, Olımpıadaǵa kóbirek lıtsenzııa alýǵa tyrysamyz», - dedi ol.
Aıta ketsek, Djakartada ótken Azııa chempıonatynda Qazaqstan boksshylary eki kúmis medaldy mise tutyp (Ábilqan Amanqul men Aslanbek Shymbergenov) qaıtqan bolatyn.