Myrzaǵalı Aıtjanov: Ulttyq quramaǵa ilikken boksshylarǵa bosańsýǵa bolmaıdy
ASTANA. QazAqparat - Ótken jeksenbi kúni Pavlodar qalasynda bokstan Qazaqstan Respýblıkasynyń chempıonaty máresine jetti. Bir aptaǵa sozylǵan tartysty jekpe-jekterde top jarǵan bylǵary qolǵap sheberlerin bas bapker Myrzaǵalı Aıtjanov ulttyq qurama sapyna tańdap aldy.
Jarystan keıin Aıtjanov myrzaǵa arnaıy qońyraý shalyp, jasaqtalǵan jańa komanda jaıynda oı bólistik.
- Myrzaǵalı Qulanuly, el birinshiligi qalaı ótti? Boksshylardyń ónerine kóńilińiz toldy ma?
- Jalpy, el birinshiligi óte joǵary deńgeıde ótti. Barlyq oblystar joǵary daıyndyqpen kelgeni kórinip turdy. Ózderińiz bilesizder, biz Rıo Olımpıadasynda qorjynymyzǵa medal salǵan azamattardy osy el birinshiliginen bosatqan bolatynbyz. Soǵan qaramastan, ár salmaqta básekelestik óte joǵary boldy. Osyndaı básekelestikti kórip, elimizdiń barlyq óńirinde bokstyń qalaı damyp jatqanyn baıqaýǵa bolady.
- Osyǵan deıin eń jeńil 49 keli salmaqta Birjan Jaqypov uzaq jyl kóshbasshylyqty bermeı kelgeni anyq. Bıyl onyń ornyn Temirtas Júsipov basyp otyr. Bul azamatqa qanshalyq úmit artýǵa bolady?
- Temirtas osyǵan deıin de sportta orny bar, tájirıbeli boksshylarymyzdyń biri ekenin kórsetip kelgen. Al senim artý máselesine toqtalatyn bolsaq, ony aldaǵy ýaqyt kórsetedi. Sebebi, aldymyzda kóptegen halyqaralyq jarystar kútip tur. Sonda búgingi myqtylarymyzdyń naǵyz synalatyn kezderi bolady.
- Al eger ishki birinshilikte chempıon atanyp, ulttyq quramaǵa ilikken boksshylarymyz sondaı halyqaralyq dodalarda el úmitin aqtaı almaı jatsa, olarǵa qandaı shara qoldanylady?
- Kez-kelgen boksshyǵa «Ulttyq quramaǵa iliktim. Endi boldy» dep bosańsýǵa bolmaıdy. Ulttyq quramaǵa kirdi me, oǵan úlken jaýapkershilik artylady. Ózimizdiń ishki tártibimiz, ishki erejelerimiz bar. Soǵan baǵynbaǵan, jattyǵýǵa selqos qaraǵan boksshylarǵa bizde oryn joq.
- Al bıyl kóptegen boksshylarymyz jańa salmaqqa aýysty. Osy jaıyndaǵy ózgeristerdi de aıta ketseńiz...
- Iá, qatyp qalǵan eshteńe joq. Sportta ózgeristiń bolyp turǵany jaqsy. Jas boksshylar ósip keledi. Dene bitimi tolyǵyp, ósken saıyn salmaǵy da ósetini zańdylyq. Іlııas Súleımenov 52 keli salmaqtan 56 kelige, Abylaıhan Júsipov 64 keli salmaqtan 69 kelige, Jánibek Álimhanuly 75 keli salmaqtan 81 kelige ótti. Bul salmaqtardyń barlyǵynda básekelestik eń joǵary. Endi naǵyz kimniń kim ekenin anyqtaıtyn bolamyz. Mine, osy jańa salmaqta Abylaıhan Júsipov pen Jánibek Álimhanuly el chempıony atanyp otyr. Bul úlken jetistik.
- 69 kelide Olımpıada chempıony Danııar Eleýsinov, al 81 kelide Olımpıadanyń eki dúrkin kúmis júldegeri Ádilbek Nııazymbetov bar. Júsipov pen Álimhanuly olardyń kóleńkesinde qalyp qoımaı ma?
- Onyń barlyǵyn ýaqyt pen rıng kórsetetin bolady. Biraq, eshkim eshkimniń kóleńkesinde qalyp qoımaıdy. Ulttyq quramadaǵy barlyq boksshylar birge jattyǵady. Eshkimdi bólip jaryp, jeke-jeke jattyqtyrmaımyz. Kim eńbektenedi, sonyń juldyzy janady. Júsipov te, Álimhanuly da áli kóp ter tógýleri kerek.
- Ulttyq qurama jasaqtaldy. Endi oqý-jattyǵý jınalysyn qashan bastaısyzdar?
- Alla qalasa, alǵashqy oqý-jattyǵýymyzdy jańa jyldan keıin, 5-26 qańtar aralyǵynda Almaty oblysyndaǵy Dúnıejúzilik boks akademııasynda ótkizýdi josparlap otyrmyz.
- Áńgimeńizge rahmet!
