Myrzaǵalı Aıtjanov: Tóreshiler ádil bolǵanda únemi «altyn» aldyq
ASTANA. QazAqparat - Bokstan Qazaqstan ulttyq quramasynyń bas bapkeri Myrzaǵalı Aıtjanov Indonezııada ótken Azııa oıyndarynyń qorytyndysy boıynsha óz pikirin bildirdi, dep habarlaıdy QazAqparat.
«Ulttyq quramanyń basy-qasynda júrgennen keıin, sportshylardyń qandaı jaǵdaıda ekenin bárin bilemin. Jigitterimiz óte jaqsy daıyndaldy. Qansha ter tógildi, biraq eńbek aqtalmady. Bunyń kóp sebepteri bar. Sol sebepterdiń kóbisi tóreshiler tarapynan boldy. Ulttyq quramanyń árbir múshesi, ıaǵnı jeti salmaqtyń barlyǵy jaqsy daıyndyqpen bardy. Mysaly, 2014 jyly Azııa oıyndarynda bizdiń ulttyq qurama alty altyn medal aldy. Ádil tóreshiler bolǵanda únemi bokstan bes altyn medaldan kem alǵan emespiz», - dep toqtaldy M. Aıtjanov.
Onyń sózine qaraǵanda, Azııa oıyndaryna Qazaqstan boksshylary kem degende 2 altyn medal alý josparymen barǵan.
«Biz qansha tyrysqanymyzben, aıaqtan shalatyn adamdar boldy. Bul jaǵdaı birinshi kúnnen bastap kórindi. Osyndaı keleńsiz jaǵdaılarǵa moıymaı, alǵa jyljý kerek», - dedi bas bapker.
Aıta keteıik, Azıada fınalynda judyryqtasqan Aslanbek Shymbergenov (69 keli) pen Ábilhan Amanqul (75 keli) tóreshiler sheshimimen jeńilis tapty. Kópshilik mamandar men jankúıerler qazaq boksshylaryna qııanat jasalǵanyn aıtýda. Eki boksshy da fınalda altynǵa laıyqty óner kórsetken bolatyn.
Budan buryn habarlanǵandaı, QR Mádenıet jáne sport mınıstri Arystanbek Muhamedıuly bıylǵy Azııa oıyndarynda Qazaqstannyń nelikten úzdik bestikke kire almaǵanyn túsindirip bergen edi.
Eske salsaq, Azııa oıyndarynda Qazaqstan quramasy 15 altyn, 17 kúmis jáne 44 qola medal alyp (barlyq medaldar sany - 76), jalpy reıtıngte toǵyzynshy orynnan kóringen bolatyn.
