Myrzaǵalı Aıtjanov: Sportqa kóńil bólý - eldiń abyroıyna nazar salý degen sóz

TÚRKІSTAN. QazAqparat - Prezıdent Nursultan Nazarbaev halyqqa arnaǵan Joldaýynda sporttyń damýyna erekshe kóńil bólý kerektigin atap ótti. Osy baǵytta 100 sport keshenin turǵyzý jóninde tapsyrma júktedi, dep habarlaıdy QazAqparat tilshisi.

Bokstan Qazaqstan ulttyq quramasynyń bas bapkeri Myrzaǵalı Aıtjanov Elbasynyń kezekti Joldaýda buqaralyq sportty damytý máselesin kótergenin ult saýlyǵynyń kepili dep biledi.

«Kúni keshe ǵana Túrkistanǵa saparynda Elbasy elimizdegi eń myqty kásipkerlerge jańa nysandar salýdy tapsyrdy. Sonyń ishinde 10 myń adamdyq zamanaýı stadıon, sý kesheni, aýla klýbtary bar. Al, sport - álemdik arenada el abyroıyn asqaqtatyp, eldiń, ulttyń atyn shyǵaratyn birden bir sala. Sportqa kóńil bólý - eldiń abyroıyna nazar salý degen sóz. Al, elimizdiń bedelin kóteretin sportshylar qaıdan shyqpaq? Árıne, ondaı jastar jer-jerlerdegi sport zaldardan, jattyǵý keshenderinen shyǵady. Muny Elbasymyz da jaqsy túsinedi»,- deıdi ulttyq quramanyń bas bapkeri.

Onyń pikirinshe, Elbasynyń  sport keshenderin salý men olardy qarapaıym halyq arasynda qoljetimdi etý jónindegi  usynysy el arasynda sporttyń damýyna septigin tıgizedi.

«Prezıdentimiz óz sózinde sport keshenderine kirý úshin oqýshylarǵa jeńildik jasaý kerektigine toqtaldy. Bul óz kezeginde buqaralyq sporttyń damýyna, osy salanyń jalpyhalyqtyq sıpatqa ıe bolýyna oń yqpal etpek»,- deıdi Myrzaǵalı Aıtjanov.