Myrzaǵalı Aıtjanov: Basty maqsatymyz – Olımpıadaǵa tolyq qurammen barý
Bási bıik doda bastalmas buryn bokstan Ulttyq quramanyń bas bapkeri Myrzaǵalı Aıtjanovpen shákirtteriniń daıyndyǵy men jospary týraly áz-kem áńgime qurdyq.
- Myrzaǵalı Qulanuly, Azııa oıyndaryna aparatyn shákirtterińizdiń esimderi belgili boldy. Sońǵy daıyndyqtaryńyz qaıda, qalaı ótip jatyr?
- Saryqurlyq dodasyna óte joǵary deńgeıde daıyndalyp jatyrmyz. Qazir Almaty oblysyndaǵy «Aqbulaq» Olımpıadalyq ortalyǵynda sportshylar taýǵa shyǵyp, dene daıyndyǵymen jattyǵýdy jalǵastyryp jatyrmyz. Sońǵy qorytyndy jattyǵý Turkistan qalasynda ótedi. Buıyrsa, 20 qyrkúıek kúni Almatydan Hanchjoý qalasyna attanamyz dep josparlap otyrmyz.
- Hanchjoýda boksshylar arasynda alǵash ret Parıj Olımpıadasyna joldamalar sarapqa salynbaq. Jalpy, qansha lıtsenzııa sarapqa salynady?
- Ózderińiz bilesizder, sońǵy kezderi boksta kóptegen ózgerister boldy. Buryn boksshylar Olımpıada oıyndarynda on salmaqta synǵa tússe, qazir onyń úsheýi qysqaryp, jeti salmaq qana qaldy. Atap aıtsaq, Parıj tórinde erler 51, 57, 63,5, 71, 80, 92 jáne + 92 salmaq dárejesinde synǵa túsedi. Saryqurlyq dodasynda da osy jeti salmaqtan fınalǵa shyqqan qos boksshy Olımpıada joldamasyn qanjyǵalaryna baılaıdy.
- Buıyrsa, sol jeti salmaqtan beriletin 14 joldamanyń qanshasyn elge ákelýdi josparlap otyrsyzdar?
- Onyń barlyǵyn rıng kórsetedi. Dese de, úsh joldamadan dámelimiz.
- Ózińiz qaı salmaqtarǵa basymdyq berip otyrsyz?
- Naqty, qaı salmaq ekenin dál qazir kesip aıtýǵa áli erte, bárin ýaqyt kórsete jatar.
- Bul joly baǵy janbaǵan boksshylar taǵy qandaı jarystarda Olımpıada joldamasyna talasýǵa múmkindikteri bar?
- Lıtsenzııa taratatyn jarystar Azııa oıyndarymen ǵana aıaqtalmaıdy. Bul basy ǵana. Kelesi, ıaǵnı, 2024 jyly Parıjdyń joldamalary sarapqa salynatyn eki iri halyqaralyq týrnır bolady. Sonyń biri Italııada, ekinshisi Bangkokta ótedi. Birinshisinde - 49, al ekinshisinde 51 lıtsenzııa oınatylady dep josparlanyp otyr. Demek, Hanchjoýda joly bolmaǵan boksshylarǵa alda áli de kóptegen múmkindikter bar. Meniń basty maqsatym – boksshylardy Parıj Olımpıadasyna jeti salmaqta tolyq qurammen aparý.
- Áńgimeńizge rahmet!
