Myrzaǵalı Aıtjanov: Azıadaǵa sońǵy daıyndyqty Astanada ótkizemiz
- Myrzaǵalı Qulanuly, XVIII Azıada oıyndaryna da bir aıdan az ýaqyt qaldy. Bıylǵy jyldyń basty dodasyna daıyndyqtaryńyz qalaı?
- Daıyndyǵymyz óte jaqsy. Shildeniń basynda Almatyda, Alataý bókterinde kezekti oqý-jattyǵý jıynymyzdy bastaǵan bolatynbyz. Búgin jigitterdi qysqa merzimge, ıaǵnı bir aptalyq demalysqa úılerine jiberip jatyrmyn. Ondaǵy maqsat - uzaq jattyǵýdan keıin kim bolsa da, otbasyn saǵynady. Aýyldyń aıran-sútin iship, qazy-qartasyn jegisi keledi. Sol úshin osyndaı sheshim qabyldadyq.
- Almatyda ótken oqý-jattyǵý barysy týraly qysqasha aıtyp ótseńiz...
- Negizi Almatyda jalpy dene daıyndyǵyn ótkizdik. Taza aýada jaqsylap kúsh-qýat aldy degen oıdamyn. Jigitter 3 200 metrge deıin taý shyńyna shyǵyp jattyqty. Odan bólek Alataý eteginde qyr-saılarmen kúndelikti júgirip turdy. Sonymen qatar taýdyń tasymen jattyǵý jasadyq. Bokstasýdy da umyt qaldyrǵan joqpyz. Sparrıng jattyǵýlardy da jıi jasadyq. Bizben birge bokstan jastar quramasy da oqý-jattyǵý jıynyn ótkizdi. Olar álem birinshiligine daıyndaldy. Osy oraıda bizdiń quramanyń jigitteri olarǵa aǵalyq iltıpatyn kórsetip, birge jattyǵý ótkizdi. Biz erteńgi úmitterimiz - jas boksshylarymyzǵa qoldaý kórsettik.
- Endi, Azıadaǵa sońǵy oqý-jattyǵýlaryńyz qashan, qaıda ótedi?
- Sońǵy oqý-jattyǵýymyz arnaıy tehnıka-taktıkalyq jaǵynan daıyndyq bolmaq. Biz ony Astanada ótkizemiz. Qysqa demalysqa ketken jigitterimiz 4 tamyz kúni elordadaǵy jattyǵý bazasynda bas qosady. Biz onda 16 tamyzǵa deıin daıyndalyp, sol kúni keshte Djakartaǵa ushyp ketemiz. Jarystyń ashylý saltanatyna qatysamyz. Ózderińiz biletindeı, bizdiń quramanyń múshesi Ábilhan Amanqul Azıadanyń ashylý saltanatynda Qazaqstan týyn alyp shyǵady.
- Azıadadan qansha medal alýdy kózdep otyrsyzdar?
- Bıyl Azıadada bokstan erler arasynda tek jeti-aq medal jıyntyǵy sarapqa salynady. Halyqaralyq áýesqoı boks qaýymdastyǵy Azıada baǵdarlamasynan 81, 91 jáne 91+ keli salmaq dárejelerin alyp tastaǵan. Bul úsh salmaqtaǵy jigitterimiz úsheýi de bas júldeden úmitker jigitter bolatyn. Biraq, biz aparatyn jeti boksshy da - óz salmaqtarynyń sańlaqtary. Sondyqtan kemi eki altyn dep otyrmyz.
- Azıadaǵa baratyn jigitter týraly qysqasha aıta ketseńiz...
- Ár boksshynyń jetistikteri, erekshelikteri týraly jeke-jeke aıtpaı-aq qoıaıyn. Sebebi olar - osyǵan deıin talaı syndarda el namysyn qorǵap júrgen belgili boksshylar. Attaryn ǵana atap, oqyrman esine salaıyn. 49 kelide Temirtas Júsipov, 52 kelide Azat Mahmetov, 56 kelide Qaırat Eralıev, 60 kelide Samatáli Tóltaev, 64 keli salmaqta Bekdáýlet Ibragımov, 69 kelide Aslanbek Shymbergenov jáne bıylǵy Azıadanyń eń aýyr salmaqtaǵy boksshysy, ıaǵnı 75 keli salmaqta Ábilhan Amanqul el namysyn qorǵaıdy.
- Áńgimeńizge rahmet!
