Myrzaǵalı Aıtjanov Azıadadaǵy ədiletsizdik týraly: Sabyr qylýdan basqa amal joq

ASTANA. QazAqparat - Bokstan Qazaqstan komandasy Azııa oıyndarynyń tarıhynda tuńǵysh ret altynsyz qaldy. Búgin fınalda judyryqtasqan eki boksshymyz da kúmisti qanaǵat tutqan bolatyn. Osy oraıda, ulttyq quramanyń bas bapkeri Myrzaǵalı Aıtjanov Olympic.kz saıtyna suhbat berip, jeńilistiń sebebin túsindirdi.  

«Azııa oıyndaryna bes júlde alamyz dep kelgenbiz. Oǵan shamamyz da jetetin edi. Alaıda, tym tómen nátıje kórsetip otyrmyz. Ár el óz sportshysyn qorǵaıdy. Sol sebepti, bir eldiń sońyna túsip alǵanymyz durys bolmas. Jigitter bar kúshin saldy, olarǵa aıtarym joq. Kóptegen kedergiler men keleńsiz jaıttar oryn alyp otyr. Fınalǵa deıin úsh boksshymyzdyń jolyn kesken. Endi, mine, eki jigitimizdiń altynyn tartyp aldy. Sabyr qylǵannan basqa amal joq.

Jalpy, bizge sharshy alańdaǵy qarsylastarmen ǵana emes, basqalarmen de kúresýge týra keldi. Qaırat Erálıevti alyp tastaǵannan keıin-aq, qıyn soǵaryn sezdim. Tipti, Azııa oıyndaryna attanar kezde de bul belgili bolǵan. Sebebi, bizdiń bir ókilimiz joq. Qazaqstandyq tóreshiler de alynbaǵan. Sondyqtan, Azııa oıyndarynda saıasat jeńdi.

Aslanbek Shymbergenovke joq jerden eskertý berip, upaıyn alyp tastady. Boksshyǵa úsh-tórt ret aýyzsha eskertý berilgen soń ǵana, upaıyn alyp tastaýshy edi. Bul joly birden...

Jigitterge aıtar ókpem joq. Bar kúshin saldy», - dedi Myrzaǵalı Aıtjanov.

Eske sala keteıik, búgin Azıada fınalynda judyryqtasqan Aslanbek Shymbergenov (69 keli) pen Ábilhan Amanqul (75 keli) tóreshiler sheshimimen jeńilis tapty.

Kópshilik mamandar men jankúıerler qazaq boksshylaryna qııanat jasalǵanyn aıtýda. Eki boksshy da fınalda altynǵa laıyqty óner kórsetken bolatyn.


FOTO: Danııar Maılybaev. Qazaqstan UOK baspasóz qyzmeti