Myrzaǵalı Aıtjanov: 2017 jyl qazaq boksy úshin sátti jyl boldy
- Myrzaǵalı Qulanuly, 2017 jyl qazaq boksy úshin qanshalyqty tabysty boldy?
- Ótip bara jatqan 2017 jyl biz úshin, ıaǵnı qazaq boksy úshin asa tabysty jyl boldy desem qatelespeımin. Óıtkeni, qazaq boksshylary ózderi qatysqan álemdik dodalardan júldesiz qaıtqan joq. Osy jyldaǵy eń basty doda álem birinshiliginde bizdiń jańadan jasaqtalǵan jas qurama komandamyz bir emes, alty medal jeńip aldy. Bul - tarıhı jeńis. Osyǵan deıin óz elimizde ótken álem birinshiliginde tuńǵysh ret 8 medal alǵan bolatynbyz. Al syrt elde 6 medalǵa birinshi ret qol jetkizip otyrmyz. Onyń ústine álem birinshiginde júlde alǵan jigitterdiń basym bóligi dodaǵa birinshi ret qatysyp turyp, sondaı jetistikterge qol jetkizýi qazaq eliniń mereıin bir kóterip tastady.
- Qazirgi quramadaǵy boksshylardyń bolashaǵy jarqyn dep esepteısiz goı...
- Árıne, báriniń bolashaǵy jarqyn. Biraq, áli Tokıo Olımpıadasyna deıin kóp ter tógýimiz kerek. Buryn Ivan Dychko, Danııar Eleýsinov, Ádilbek Nııazymbetov sııaqty Álem jáne Olımpıada oıyndarynda qanjyǵalary bir emes, birneshe ret maılanǵan boksshylarymyzǵa qanshama eńbek ettik. Olardyń búgingi jetistigi - sol eńbektiń jemisi. Olardyń keıbireýimen 10 jylymyz birge ótipti. Bul az ýaqyt emes. Áli birge jumys jasap jatqan boksshylar bar. Endi, sol sııaqty, qazirgi jas komandamen de uzaq ýaqyt jumys jasaýymyz kerek. Sonda ǵana nátıje bolady. Álem, Olımpıada chempıony bir kúnde, ne bir aıda daıyndap shyǵa salatyn dúnıe emes. Sol úshin eshqashan osaldyq tanytpaı, eńbektene berýimiz kerek. Bizge múlde bosańsýǵa bolmaıdy.
- Bıylǵy el birinshigine, álem chempıonatynda júlde alǵan alty boksshy qatysqan joq. Biraq, sonda da doda asa tartysty ótti. Keıbir saqa boksshylar jas býynnan jeńilip jatsa, al bireýi áli de kóshbasshy ekenin dáleldep jatty. Quramany jańadan jasaqtaý qanshalyqty qıyn boldy?
- Árıne, ońaı bolǵan joq. Bizdi qýantatyny elimizde qaı salmaq bolmasyn, básekelestik asa joǵary ekenin baıqadyq. Mine, bizge de keregi osy. Básekede kim ozyq, sol quramaǵa ilikti. Tipti, olardyń qatarynda bir-eki jyl demalyp qalyp, qaıtadan ózin dáleldegen boksshylar da bar. Osydan birer kún buryn ǵana eń jańa qurama músheleriniń tizimin jarııaladyq. Ózderińiz kórgendeı, olardyń qatarynda jastarmen bir qatarda saqa boksshylar da bar. Olardyń kimder ekenin ózderińiz de kórgen bolarsyzdar.
- Jańa tizimnen Danııar Eleýsinovtiń de esimin kórip qaldyq. Ol ulttyq quramaǵa resmı túrde qaıtyp keldi me?
- Iá, qaıta keldi. Endi ol burynǵydaı quramada jattyǵady. Ol óziniń burynǵy babyna kelip, myqtylyǵyn qaıta dáleldep jatsa, kelesi jyly ótetin halyqarylyq, álemdik dodalarǵa barýǵa múmkindik alady. Ótkende bireý «quramaǵa ardager» boksshylardy nege qaldyrdyńyzdar dep surap jatyr. Árkim óz salmaǵynda qyryq jasqa deıin kúsh-qýaty qaıtpaı, kóshbasshy ekenin dáleldep tursa, Álem, Olımpıada oıyndarynda súrinbeı júlde alyp jatsa, biz olardy nege qýyp jiberýimiz kerek? Kerisinshe, quramaǵa alynǵan jas býyn boksshylarymyzdyń Olımpıada chempıony Danııar Eleýsinov, Olımpıada men Álem birinshiliginiń eki dúrkin kúmis júldegeri Ádilbek Nııazymbetov, álem chempıony Jánibek Álimhanuly sııaqty boksshylarmen birge jattyǵýy olarǵa maqtanysh emes pe? Solarǵa qarap boı túzemeı me? Sol úshin saqa boksshylardyń bolǵany quramaǵa paıdasynan basqa zııany joq. Olar - ábden ysylǵan boksshylar. Osyǵan deıin eldiń eldigi synǵa túsetin sátte, jasyndaı jarqyrady. Aldaǵy ýaqyttarda da sol bıikterinen kórinedi degen úmittemiz.
- Sońǵy kezderi qazaq boksshylarynan kásipqoı boksqa ketip jatqandardyń sany artyp keledi. Ulttyq quramadaǵy boksshylar kásipqoıǵa aýysamyz dep jatsa, qarsy bolar ma edińiz?
- Eger kásipqoı boksqa aýysamyn degender bolsa, men ustamaımyn. Erki ózinde. Men eshkimdi baılap, matap otyrǵan joqpyn. Qazir, Allaǵa shúkir, ulttyq qurama tórt quramda jasaqtalǵan. Bizdiń eń tómengi tórtinshi quramamyzdyń ózinde «sen tur, men ataıyn» degen jigitter bar. Osy tórt quramdy da qarjylandyryp otyrǵan Qazaqstan boks federatsııasynyń basshylyǵyna alǵysymyz sheksiz. Bar jaǵdaıymyzdy jasady. Qazaqta «jaqsynyń jaqsylyǵyn aıt, nury tasysyn» degen sóz bar. Ashyǵyn aıtý kerek, elimizdiń boks federatsııasyna Tımýr Qulybaev myrza kelgennen beri qazaq boksynyń kósegesi kógerdi. bapkerlerge de, boksshylarǵa da barlyq jaǵdaı jasaldy. Biz osyndaı jasalǵan qamqorlyqtyń arqasynda bıik belesterdi baǵyndyrýǵa múmkindik alyp otyrmyz.
- Ómirde qýanysh bar jerde, ókinish te bolyp jatady. Osy jyly jetistikterińizden basqa «áttegen-aılaryńyz» boldy ma?
- Joq emes. Buǵan Ózbekstanda ótken Azııa birinshiligin mysalǵa keltirýge bolady. Eń jańa jas qurammen bardyq ta qola, kúmisten bólek jalǵyz altynǵa qol jetkizdik. Ol jerde bizdiń boksshylar «barmaq basty, kóz qysty» áreketterdiń de qurbany boldy. Biraq, barlyǵyn tóreshilerden kóre berýge bolmaıdy. Kóptegen olqylyqtarymyz boldy. Keıin sol olqylyqtardy joıýmen jumys jasadyq. Álem birinshigine kemi eki altyn alamyz dep bardyq. Ókinishke qaraı, bir altynǵa ǵana ıe boldyq. Mine, osynyń barlyǵynyń ar jaǵynda bir «áttegen-aılar» qaldy.
- Endi kelesi jylǵa basty maqsat etip otyrǵan josparlaryńyzben bólise ketseńiz...
- Kelesi jyldyń basty jospary - Indonezııada ótetin jazǵy Azııa oıyndary. Osy saryqurlyq dodasynda top jarý - bizdiń basty maqsatymyz.
Oǵan deıin kóptegen jarystarǵa, oqý-jattyǵýlarǵa qatysamyz. Kelesi jyldyń daıyndyǵyn qańtar aıynda Almatyda bastaıtyn bolamyz. Aqpan aıynda Reseı, Ózbekstan quramalarymen birlesken oqý-jattyǵýlaryn jasasaq, naýryzda Reseıge baramyz. Sáýirde taǵy bir shetelge oqý-jattyǵýǵa barýdy josparlap otyrmyz. Mamyr aıynda óz elimizde shet elden quramalar shaqyryp jattyǵý jasaıtyn bolamyz. Arasynda kóptegen halyqaralyq dodalar bolady. Sol jarystarǵa tórt quramdy da qatystyryp, ishinen kil myqtylardy taldap, Azııa oıyndaryna aparýdy josparlap otyrǵan jaıymyz bar.
- Áńgimeńizge kóp rahmet! Sáttilik tileımiz.