Myrzabaı áýlıe mazarynan kóne Quran kitaby tabyldy - Qyzylorda oblysy
ASTANA. QazAqparat - Qyzylorda oblysynda bir jarym ǵasyrǵa jýyq jer astynda kómýli jatqan qasıetti kitap tabyldy.
19-ǵasyrǵa tıesili qundy jádiger Jalaǵash aýdanyndaǵy Myrzabaı ahýn mazarynyń mańyn qazǵan kezde shyqqan, dep habarlaıdy Habar 24 .
Óz zamanynyń áýlıe, emshisi bolǵan ahýn Myrzabaı Azamatuly 1833 jyly Syr óńirinde ómirge kelgen. Kóne kitapty baba qorymyn qaıta jóndemek bolǵan urpaqtary taýyp aldy. Sol ýaqytta qazaq jerinde azattyqtyń tańy atatynyn aıtyp ketken áýlıe qasıetti Quran kitabyn alasapyran zamanda ózi kómgenge uqsaıdy. Muqabalary shirip, paraqtary jyrtylǵanymen, jazýlary anyq saqtalypty.
«Meshittiń ishine jóndeý jumystaryn jasaıyn dep, buryshty qazyp jatqanymda, balamyz ekeýmiz tize boıy qazǵan kezimizde osy Quran kitaptarynyń shyqqanyna kózim jetti de balamyz ekeýmiz qaza bastadyq. Sodan 2 jarym qaptaı Quran kitap shyqty. Mynaý sonyń ishinen shyqqan Quran kitaptar, jazýlary bar, topyraqqa aınalyp ketkeni bar. 1 jarym ǵasyr bolyp tur ǵoı endi osy jer astynda jatqanyna. Ne jóninde jazǵan osyny, ǵulamalar anyqtap berse deımin», - deıdi Myrzabaı ahýnnyń shóberesi Oraz Salqashuly.
