«Myńjyldyqtar toǵysyndaǵy Astana» elordalyqtardy kóshpeliler ómiri kózimen kórýge shaqyrady (FOTO)
ASTANA. QazAqparat - Búgin elordada «Myńjyldyqtar toǵysyndaǵy Astana» kóshpeliler órkenıeti festıvaliniń qorytyndy kúni. 4 shildede ashylǵan merekelik shara «Han Shatyr» oıyn-saýyq saýda ortalyǵy janyndaǵy alańda ótýde. Festıval elorda kúnine arnalǵan.
Atalǵan shara Astanada 9 jyl qatarynan ótkizilip keledi, oǵan 300 jýyq ártis qatysýda. Munda ótken zamanda kıgen kıimderdi, dekoratsııalardy, qolóner sheberlerin jáne shabandozdardy kórýge bolady.
Shara barysynda kelýshiler nazaryna dástúrli mýzyka kontserti men aqyndar aıtysy, «At jalynda» atty sporttyq shoý, «Altyn saqa» jarysy, «Folklordaǵy ómir» etnoshoýy, kóshpeliler tsırki usynylýda, sondaı-aq, kerýen saraı men halyqtyq qoldanbaly óner jármeńkesin, mýzykalyq aspaptar kórmesin de tamashalaı alady.
«Bizdiń árqaısymyz elorda kúnin jan-júregimizden asyǵa kútemiz. Óıtkeni, jerlesterimizge bizdiń mádenıetimizdiń, ótkenimizdiń qanshalyq sulý ári baı ekendigin, jan-jaqtylyǵy men biregeıligin kórsetýge asyǵamyz. «Arlan» teatry qazaq halqynyń, onyń mádenıet men murasynyń jandy eskertkishi. Árbir memlekette ulttyq ıdeologııa bolýy tıis. Bizdiń maqsatymyz - qazaq halqynyń ulttyq dástúrlerin tanytý jáne hasıhattaý», - dedi «Arlan» teatrynyń jetekshisi Múslim Jumaǵalıev.
«Hassaq» jáne «Saryarqa» folklorlyq-etnografııalyq ansamblderdiń kontsertterinen keıin saǵat 17-00-de el Táýelsizdiginiń 25 jyldyǵyna arnalǵan epos keshi ótedi. Aýqymdy is-sharanyń túıindi shyrqaý shegi «Astana-Arqaý» túrki mýzykasynyń dástúrli festıvali bolmaq.
Festıvaldi saltanatty túrde saǵat 20-00-de «Toı tarqar» sharasy jabady.
Festıvaldi uıymdastyrýshylardyń aıtýynsha, bıyl kelýshiler nazaryna jańa ınstallıatsııalar jáne eń bastysy mýzeı usynyldy. Onda óshpeli qazaq halqynyń materıaldyq jáne rýhanı mádenıetiniń artefaktileri, eskertkishteri qoıylǵan. Dástúrli turǵynjaı ıntereri jasalyp, ulttyq kostıýmniń túr-túri, áshekeıler, turmystyq zattar, qarý-jaraqtar usynylǵan. Elimizdiń murajaılarynyń qorlarynan jınalǵan eksponattar kelýshilerdi Ortalyq Azııadaǵy kóshpeliler órkenıetiniń álemimen tanystyrady.
