Myńnan astam pavlodarlyq Elbasynyń maqalasyn talqylady
Oǵan depýtattar, bıznesmender, mádenıet jáne óner salasynyń qaıratkerleri, Qazaqstan halqy Assambleıasy etno-mádenı birlestikterdiń ókilderi, óndiristik kásiporyndardyń basshylary, jastar men memlekettik qyzmetshiler qatysty, dep habarlaıdy pavlodarnews.kz.
«Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» atty aýqymdy maqalasynda
elimizdiń rýhanı jańǵyrý jolyndaǵy bolashaq baǵyty aıqyndalyp otyr»,-dedi óz sózinde aımaq basshysy Bolat Baqaýov. «Biz - birlik pen berekeni, turaqtylyq pen kelisimdi nyǵaıta otyra, «Máńgilik el» ıdeıasyn shynaıy júzege asyrýǵa bet aldyq. Osy jolda Elbasymyz tutas qoǵamnyń, árbir Qazaqstan azamatynyń sanasyn jańǵyrtýdyń naqty birneshe baǵyttaryn aıqyndap berdi. Memleket basshysy aýqymdy maqalasynda elimizdiń básekege qabiletti bolýyn atap ótti. Kez kelgen ortada básekege qabiletti bolý - tabysty adamnyń formýlasy. Ol búgingi zamannyń talaby. Sondyqtan da Elbasymyz bıylǵy Joldaýynda, «Tsıfrly Qazaqstan», «Mádenı jáne konfessııaaralyq kelisim», «Úsh tilde oqytý» sııaqty baǵdarlamalardy atap ótken bolatyn. Jańǵyrýdyń jarqyn úlgisi retinde, Elbasymyz pragmatızmniń jarqyn úlgilerin usyndy. Sondyqtan da, bolashaqty boljap, ony tıimdi qoldana bilý - bolashaǵy jarqyn ulttyń aıqyn maqsaty dep bilemin. Aldaǵy onjyldyqta bizdiń atqaratyn jumystarymyz - realızm men pragmatızmge negizdelýi kerek». Sondaı-aq oblys ákimi óz sózinde Pavlodar óńiri mádenıet pen rýhanııattyń qaınaǵan ortasy ekenin aıtyp, jerlesterimizge ony odan ary damytý kerek ekenin eskertti. Sonymen qatar, Elbasy kótergen Qazaqstanda latyn álipbıin qoldanysqa engizý máselesine de erekshe mán berý kerek ekenin jetkizdi. - Biz osy jolda aıanbaı eńbek etip, Ertis-Baıan óńirin túletip, rýhanı-mádenı ómirin jaqsartýǵa bel sheshe kirisemiz dep senemin. Elbasymyz óz maqalasynda taıaý jyldarǵa arnalǵan naqty mindetterdi aıqyndap berdi. Birinshiden, qazaq tilin birtindep latyn alfavıtine kóshirý. Bul qazirgi zaman talabyna saı, tehnologııalyq ortanyń kommýnıkatsııa men ǵylym jáne bilim berý protsesterine baılanysty bolyp otyr. 2018 jyldan bastap, elimiz jańa alfavıtti úıretetin mamandar men orta mektepterge arnalǵan oqýlyqtardy shyǵarýǵa kirisetin bolady. Osy rette, ásirese, jańashyl rýhta tárbıe kórgen jastarymyz belsendi jumys jasaý kerek. Elbasy júktegen taǵy bir mindet -«Qazaqstandaǵy 100 jańa esim» jobasyn júzege asyrý bolyp otyr. Elimizdiń damýyna osy jyldar ishinde eńbek sińirgen naǵyz azamattar Ertis-Baıan óńirinde az emes. Búgingi zamannyń tulǵalaryn el-jurty jan-jaqty, taný kerek, - dedi Bolat Baqaýov.
Elbasynyń «Bolashaqqa baǵdar: rýhanı jańǵyrý» atty maqalasynda usynylǵan máselelerdi óńirdegi jýrnalıster qaýymy da qoldaıdy. Óıtkeni, Elbasy óz maqalasynda: «Týǵan jer»baǵdarlamasyn qolǵa alýdy usynam, osy baǵdarlamany iske asyrýda BAQ osydan týyndaıtyn ulttyq aqparattyq jobalarmen júıeli túrde, myqtap aınalysýy kerek» dep, jýrnalıster qaýymyna naqty tapsyrmalar júktegen bolatyn. Oblystyq «Halyq radıosy» bas redaktorynyń orynbasary Raýshan Sybanjanovanyń pikirinshe, osy baǵdarlama aıasynda óńirimizdegi kıeli oryndar men tarıhı jerlerdi taǵy bir zerttep shyǵý kerek. - Ekibastuz óńirindegi Aqkól - Jaıylma eldi mekenin áýlıeli Aqkól atandyrǵan dinniń shamshyraǵy - Isabek ıshan haziret kesenesi bar. Sol Isabekteı haziretti ustaz tutqan Máshhúr Júsip Kópeıuly, Sharbaqtynyń týmasy Ǵabdylýahıt Tilenshiuly jáne qazaq ádebıetiniń máńgi jas aqyny atanǵan Sultanmahmut Toraıǵyrov pen týylǵanyna 150 jyl tolatyn aqyn Estaı Berkimbaıuly jatqan qasıetti oryndardy atap ótýge bolady. Taýy men tasy tereń tarıh pen syr jasyrǵan Baıanaýyl óńiriniń árbir shoqysy jatqan bir tarıhtyń naq ózi desek bolar. Tize bersek, Ertis - Baıan óńiriniń ózinde osyndaı kıeli mekender óte kóp,- dedi Raýshan Sybanjanova.
