Myńnan astam múgedek kásipker «Damý-kómek» baǵdarlamasy aıasynda kómek aldy
ASTANA. QazAqparat - Aǵymdaǵy jyldyń basynan myńnan astam múgedek kásipker «Damý-kómek» baǵdarlamasy aıasynda kómek aldy. Bul týraly «Damý» qorynyń baspasóz qyzmetinen habarlady.
«Damý» kásipkerlikti damytý qory» AQ múmkindigi shekteýli adamdardy qoldaýǵa arnalǵan «Damý-kómek» baǵdarlamasynyń aralyq qorytyndysyn shyǵardy. Jyl basynan beri qazaqstandyq bıznesmender tarabynan túsken 1400 ótinimniń 1080-nen astamy maquldandy. Maquldanǵan ótinimderdiń sany boıynsha Ońtústik Qazaqstan, Almaty jáne Qostanaı oblystarynyń múmkindigi shekteýli kásipkerleri kósh bastap tur», - delingen habarlamada.
Qordyń habarlaýynsha, «Damý-kómek» baǵdarlamasy múmkindigi shekteýli jandardy óz bıznesin ashýǵa yntalandyrdy. «Kásipkerliktiń jedel kýrsy» baǵdarlamasy boıynsha qashyqtan oqyp, «Bıznes-keńesshi» jobasy aıaynda bıznes qurý ári júrgizýdi úırenýge jáne jumys tabýǵa múmkindik bar. Aıta keterligi, «Damý» qory múgedekterge qarjylaı kómek kórsetpeıdi. Tek múgedek kásipkerler men áleýetti demeýshiler arasyndaǵy baılanystyrýshy býyn qyzmetin atqaryp, qajetti qural-jabdyqtar men ilespe materıaldardy satyp alýǵa járdem beredi.
