Myńnan astam Qazaqstan azamattary bala asyrap alý kezeginde tur - J. Túımebaev
ASTANA. Aqpannyń 25-i. QazAqparat /Qanat Mámetqazyuly/ - Myńnan astam Qazaqstan azamattary bala asyrap alý kezeginde tur.
Búgin QR Parlamenti Senatynyń jalpy otyrysynda «Balalardy qorǵaý jáne balany sheteldik asyrap alýǵa qatysty yntymaqtastyq týraly konventsııany ratıfıkatsııalaý týraly» zańdy talqylaý barysynda Bilim jáne ǵylym mınıstri Janseıit Túımebaev osylaı málim etti, dep habarlaıdy QazAqparat.
«Sońǵy ýaqytta jetim balalardy asyrap alǵysy keletin Qazaqstan azamattarynyń sany artyp keledi. Búginde el azamattary myńnan astam jetim balany óz otbasyna alýǵa tilek bildirgen. Ótken jyly 3 myńnan astam jetim bala qazaqstandyq azamattardyń otbasyna berildi. Bul 2008 jylmen salystyrǵanda 271 balaǵa artyq. Qazaqstan azamattarynyń bala asyrap alýyna baılanysty birqatar erekshelikter de bar», dedi mınıstr.
Onyń aıtýynsha, Qazaqstan azamattary jetim balany asyrap alǵanda eń aldymen sábıdiń densaýlyǵyna kóp kóńil bólip, onyń saýlyǵyna barynsha mán beredi. Ekinshiden, tilek bildirgenderdiń basym bóligi óz ultynyń balasyn asyrap alýdy qalaıdy. Úshinshiden, asyrap alýshylar balanyń jasyna kóbirek nazar aýdarady. Tórtinshiden, qazaqstandyqtar balany asyrap alǵanda ózine uqsastaryn tańdaýǵa tyrysady.
