Myńnan asa mektepte oqýshylardyń bilimine monıtorıng júrgizilýde

NUR-SULTAN.QazAqparat – Búgin elimizdiń 1447 mektebinde oqýshylardyń bilim jetistikterine monıtorıng júrgizý bastaldy, dep habarlaıdy QazAqparat tilshisi.

Bul jóninde QR Bilim jáne ǵylymı mınıstriniń birinshi orynbasary Sholpan Qarınova Facebook-tegi paraqshasynda jazdy.

«Búgin elimizdiń 1447 mektebinde, bul barlyq mektepterdiń 25%-y, oqýshylardyń bilim jetistikterine monıtorıng júrgizý bastalady. Oǵan 4 jáne 9 synyp oqýshylarynyń arasynan 112 myńnan astamy qatysady. Ol sáýirdiń 29-na deıin jalǵasady. Qatysatyn mektepter kezdeısoq tańdaý ádistemesimen anyqtaldy», - deıdi vıtse-mınıstr.

Aıtýynsha, atalmysh shara zańǵa byltyr engizilgen. Bıyl mektepterde alǵash ret ótkizilip otyr.

Monıtorıng mektep bazasynda ótedi. Oqýshylardyń matematıkalyq, jaratylystaný jáne oqý saýattylyǵy baǵalanady.

«Oǵan oqýshylardy arnaıy daıyndaýdyń qajeti joq. Monıtorıng suraqtary oqý baǵdarlamalary boıynsha ázirlengen jáne oqýshylardyń fýnktsıonaldyq saýattylyǵyn anyqtaýǵa baǵyttalǵan», - dep jazdy mınstrdiń orynbasary.

Sholpan Qarınovanyń jazýynsha, monıtorıng qorytyndysy boıynsha mektepter úshin jeke taqyryptar men balalarǵa qıyndyq týǵyzǵan materıaldar talqylanady. Nátıjesinde sapaly bilimge qol jetkizý úshin bilim sapasyn arttyrý jolynda ár óńirge jáne jekelegen mektepterge arnalǵan keshendi taldaý júrgizilip, ádistemelik usynymdar ázirlenedi.

Eske salsaq, Sholpan Karınova ulttyq biliktilik testin tapsyrý kezinde qaıtys bolǵan pedagog jaıly pikir bildirgen bolatyn.