Myńǵa jýyq qyz-kelinshekti qolónerge baýlyǵan ájeniń armany - óner mektebin ashý
SEMEI. QazAqparat - Semeı qalasyndaǵy «Aısha Bıbi» qoǵamdyq birlestiginiń tóraıymy, «Birlik» medaliniń ıegeri, on saýsaǵynan óner tamǵan sheber Aıman Ybyraıqyzynyń esimi kópshilikke tanys. Ol búginde kóptegen jas qyz-kelinshekterdi qolónerge baýlyp júrgen ájelerdiń biri, dep habarlaıdy «QazAqparat» HAA.
Aıman Ybyraıqyzy 1945 jyly 28 shildede Shyǵys Qazaqstan oblysy Kókpekti aýdany Shegelek aýylynda kópbalaly otbasynda dúnıege kelgen. 3 ul, 7 qyzdan keıin týǵan úıdiń kenjesi bıyl 73 jasqa tolady. Áıtse de ájeı qartaıdym dep qarap otyrǵan joq, kerisinshe jastardy qolónerge baýlyp, udaıy qalada ótetin mádenı sharalarynyń basy-qasynan tabylady.
Joldasy dúnıeden ótip, ózi zeınetke shyqqannan keıin qalalyq Dostyq úıi ishinen 2002 jyly «Aısha bıbi» qalalyq mádenıet ortalyǵy qoǵamdyq birlestigin qurady. Mundaǵy maqsat - ulttyq salt-dástúr men qazaqtyń mádenıetin jastarǵa nasıhattaý. Alǵash birlestik qurylǵan ýaqytta 5-6 áje bolsa, keıin múshe bolýǵa nıet tanytqan ájeler sany artyp, qazirde 60-qa jetken. Eń úlkeni 80 jasta. Barlyq ájeler on saýsaǵynan óner tamǵan sheberler. Óz bilgenderin jas býynǵa úıretý maqsatynda ortalyq ishinen «Altyn oımaq» úıirmesin ashqan.
Búginde túrli kýrstar ótkizip, quraq kórpe tigý, tekemet basý, syrmaq oıýdyń qyr-syryn jas qyz-kelinshekterge úıretip júr. Ájeler búginge deıin myńǵa jýyq qyz-kelinshekti qolónerge baýlyǵan eken.
«Meniń ákem de, sheshem de sheber kisiler edi. Bala kúnimde úıdiń kenjesi bolǵan soń erke bolyp óstim. Sondyqtan bolar, qolóner jumystaryn asa unata qoımaıtynmyn. Anam jún tútken ýaqytta kómekke shaqyrǵanda shóshek teremin dep syltaýratyp, qashyp ketetinmin. Biraq óse kele anamnan barlyǵyn úırendim. Jaz shyqsa matany boıap, qaınatyp, alasha toqıtynbyz. Turmysqa shyqqan kezde alasha, syrmaq, tekemetti kórgende meniń jasaýyma barlyǵy qyzyǵa qarady. Jasaýym áli kúnge deıin saqtaýly», - deıdi sheber ájeı Aıman Ybyraıqyzy.
Sondaı-aq, qoǵamdyq birlestiktegi ájeler ózderi jasaǵan buıymdaryn 2009 jyldan beri aımaqaralyq, halyqaralyq baıqaýlarǵa, kontsertter men kórmelerge qatystyryp keledi. Olardyń týyndylary Astanada ótken halyqaralyq «EXPO-2017» kórmesine de qoıylyp, ónerlerin kópshilikke pash etip qaıtqan.
Eldi asharshylyq jaılaǵan 1930-shy jyldary Aıman Ybyraıqyzynyń ata-anasy otbasyn aman saqtap qalý úshin Reseıge kóship, 1938-shi jyly elge qaıtyp oralǵan eken. Qazaq mektebi bolmaǵan soń áke-sheshesi amalsyz orys mektebine bergen. Oryssha bilim alyp, jumysqa ornalasyp, orys ultynyń ókilderimen birge qyzmet atqarady. Biraq qalalyq Dostyq úıine kelip, ózi ortalyq ashqannan keıin nebári 3 jylda qazaq tilin meńgergen. 
«Ákem bizge qarap qaıǵyratyn. «Sender oryssha oqydyńdar, jumysty oryssha isteısińder. Endi jer betinen qazaqtar joıylyp ketpese eken» dep ýaıymdaıtyn. Qarasýǵa kóship kelgende orys mektebi ǵana boldy. Ondaǵy muǵalimderdiń barlyǵy Máskeý-Lenıgrad ınstıtýtyn bitirgender. Biraq sanaýly jyl ishinde qazaq tilin úırendim», - deıdi áje.
Joldasymen 26 jyl otasqan Aıman Ybyraıqyzy 1 ul 2 qyzdy dúnıege ákelgen. Búginde 10 nemere súıip otyrǵan aqjaýlyqty áje. Endigi armany - Semeıde óner mektebin ashý. Osylaısha qolónerge qyzyǵýshylyq tanytatyn qyz-kelinshekterdi umytylyp bara jatqan qazaqtyń qolónerine baýlý.
