Myńǵa jýyq adam Qostanaı oblysyna ońtústik óńirlerden qonys aýdardy

QOSTANAI. QazAqparat – Qostanaı oblystyq máslıhatynyń kezekti sessııasynda «Eńbek» nátıjeli jumyspen qamtý jáne jappaı kásipkerlikti damytý baǵdarlamasynyń júzege asyrylý barysy talqylandy, dep habarlaıdy QazAqparat.

Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Aıda Qusaıynovanyń aıtýynsha, byltyr baǵdarlamanyń birinshi baǵyty boıynsha 2 682 adam oqytýǵa jiberilgen. Olar oblystaǵy 33 bilim berý uıymynda jáne 3 oqý ortalyǵynda 35 mamandyq boıynsha dáris aldy. Oqyp shyqqan adamdardyń 1 673-i jumysqa turǵan.

«Baǵdarlamanyń ekinshi baǵyt boıynsha jańa bıznes-ıdeıalardy júzege asyrý maqsatynda, jalpy somasy 364,5 mln teńge bolatyn 769 grant berildi. 480 azamat tıesili grantyn eńbek quraldaryn alýǵa jumsasa, 205 adam bul múmkindikti tehnologııalyq qurylǵylar alýǵa, 84 jas kásipker mal men qus satyp alýǵa jumsady. Aımaqtyq kvotamen 1 651 adam qamtyldy. Olardyń 836-sy ońtústik óńirden qonys aýdarǵandar bolsa, qalǵany – syrt elderden kóship kelgen qandastar. Bul azamattardyń barlyǵymen áleýmettik kelisimshart jasasýǵa, kóshi-qondaryna sýbsıdııa tóleýge, baspana jaldaýǵa nemese satyp alýǵa 440 mln teńge bólingen. Sonyń arqasynda 176 otbasy úımen qamtyldy», - dedi basqarma basshysy.

Byltyr oblysta 16 myńǵa jýyq jumys orny ashyldy. Onyń 9 708-i – turaqty jumys orny. Memlekettik baǵdarlamalar aıasyndaǵy jobalar arqyly paıda bolǵan jumys oryndarynyń sany – 8 732. Bıyl jumyspen qamtý sharalarymen 22 500 adamdy qamtý josparlanyp otyr.