Myńdaǵan aqtóbelik merekelik sherýge shyqty
AQTÓBE. QazAqparat - Aqtóbede «Bir shańyraq astynda» atty merekelik sherý ótti. Sherýge etno-mádenı birlestik ókilderi men qaladaǵy iri zaýyt jumysshylary, oqý oryndarynyń stýdentteri men oqýshylar shyqty, dep habarlaıdy QazAqparat tilshisi.
Aqtóbede 18 etno-mádenı birlestik bar. Olar tili men salt-dástúrin saqtaý úshin ár jeksenbi saıyn Qazaqstan halyq Assambleıasy úıine jınalady. Óńirde ótip jatqan mádenı sharalarǵa belsene qatysatyn óner ujymdary búgingi merekede ulttyq kıimderin kıip, arnaıy kórme-jármeńke uıymdastyrdy. Qalanyń bas dańǵylymen júrip ótken sherýshiler «Birlik pen yntymaqtastyq» sýly-jasyldy jelekjolyna jınaldy. Oblys ákimi Berdibek Saparbaev aqtóbelikterdi birlik merekesimen quttyqtap, dostyq pen tatýlyqty berik ustanýǵa shaqyrdy.
«Ár ulttyń, memlekettik damýy sol eldegi birlikke yntymaqqa, dostyqqa baılanysty. Ótken 25 jyldaǵy Qazaqstannyń eń negizgi jetistigi, qundylyǵy - turaqtylyq, birlik, jańǵyrý. Memleket basshysy Nursultan Nazarbaev aıtqandaı, osyny biz kózimizdiń qarashyǵyndaı saqtaýymyz kerek. Sonda bizdiń memleketimiz damıdy, bolashaǵy bolady. Biz ózimiz ash-jalańash otyrsaq ta dastarhanymyzdaǵy, úıimizdegi baılyǵymyzdy basqa ulttyń ókilderine bólip bergen ultpyz. Biz basqa ulttyń ókilderin jat, bizge qatysy joq ulttar dep bólgen emespiz. Sonyń nátıjesinde Qazaqstannyń, qazaqtyń dúnıejúzinde alar orny bar. Qazaqstandaǵy dostyq laboratorııasy, Qazaqstan halqy Assambleıasy dúnıejúzine ónege. Qazirgi urpaqtyń mindeti osy isti jalǵastyrý»,- dedi Berdibek Saparbaev. 
1 mamyr - Qazaqstan halyqtarynyń birligi kúni óńirdegi barlyq saıabaqtarda «Birliktiń shańyraǵy - kıeli Qazaqstan» atty merekelik kontsert boldy. Qaladaǵy saıabaqtardyń jazǵy maýsymy ashylyp, sýburqaqtar iske qosyldy.
