Myń tomnan turatyn qarjy pıramıdasy isi boıynsha 25 adam sottaldy
Aıyptalýshylar 2017-2020 jyldar aralyǵynda «Evolution Corporation» jáne «Indıgo 24» qarjy pıramıdalaryn quryp, halyqty aldap kelgen. Atap aıtqanda Túrkistan, Mańǵystaý, Jambyl oblystary men Shymkent, Astana jáne Almaty qalalarynda qarjy pıramıdalarynyń jumysyn júzege asyryp kelgeni anyqtaldy. Olarǵa qatysty qylmystyq is myńnan asa tomǵa jınaqtalyp, oblystyq sotta bir jyldan asa ýaqyt boıy qaraldy. Nátıjesinde sot uıymdasqan qylmystyq top basshysy men eki quryltaıshysyn 12 jylǵa bas bostandyǵynan aıyrdy. Qylmystyq top basshysynyń senimdi serigi bolǵan 5 adam 10 jylǵa jaza arqalady. Qalǵan 17-si 8 jylǵa qamaldy. Olar jazasyn qylmystyq atqarý júıesiniń ortasha qaýipsiz mekemelerinde óteıdi. Sottalýshylardyń eń úlkeni – 55 jastaǵy áıel bolsa, eń jasy – 31 jasta. Barlyǵynyń dúnıe-múlki tárkilenip, jazasyn ótep shyqqan soń 7 jylǵa deıin qarjylyq uıymdarda jumys isteýine tyıym salyndy. Búgingi sot úkimine saı úıqamaqta otyrǵandary sot zalynan dereý qamaýǵa alyndy.
Eske salaıyq, eki myńnan astam jábirlenýshi polıtsııaǵa 2020 jyldan bastap aryzdana bastaǵan bolatyn. Olar «Evolution Corporation» men «Indıgo 24» JShS qarjy pıramıdasynyń qurbany bolǵany jóninde aryzdanyp, tergeýdi Túrkistan oblysy polıtsııa departamentiniń tájirıbeli tergeýshiler toby júrgizdi. Sotqa deıingi tergep-tekserý bir jyldan astam ýaqyt boıy jalǵasty. Nátıjesinde qarjy pıramıdasyn qurýǵa jáne ony basqarýǵa qatysy bar degen kúdikpen polıtsııa qyzmetkerleri 25 adamdy anyqtap, ustady. Olardan kompıýterlik tehnıka, jyljymaly jáne jyljymaıtyn múlikter tárkilendi. Tergeý kezinde aıyptalýshylardyń birneshe jyldar boıy salymshylarǵa aqshalary eselep qaıtatynyn ýáde etip, turǵyndardan alaıaqtyq jolmen 3 mıllıard teńgeden asatyn qarajatty ıemdengenin anyqtaldy.
