Myń mektep salý tapsyrmasy qalaı júzege asady – Ashat Aımaǵambetov

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov Prezıdenttiń myń mektep salý týraly tapsyrmasy qalaı oryndalatynyn aıtty, dep habarlaıdy QazAqparat.

Mınıstr Prezıdenttiń bilim jáne ǵylym salasy boıynsha da birqatar mańyzdy ári ózekti mindetter júktegenin atap ótti.

«Prezıdent Joldaýynda kózdelgen tapsyrmalardyń ýaqytyly jáne sapaly oryndalýyn qamtamasyz etý úshin barlyq qajetti shara qabyldanatyn bolady. Joldaýda aıtylǵandaı, ýrbanızatsııa jáne demografııalyq protsesterge baılanysty 2025 jyly mektepterde qosymsha shamamen 1 mln oryn qajet bolady. Bul máseleni sheshý úshin myń jańa mektep salynady. Osy jyldyń ózinde 200 mektepti ashý josparlanyp otyr. Ákimdiktermen birlesip, 4 tetik paıdalanylady. Atap aıtqanda, memlekettik-jekemenshik áriptestik, jeke mektepter jelisin damytý, memlekettik bıýdjetten nysanaly qurylys jáne modýldik konstrýktsııalardan mektepter salý», - dep jazdy mınıstr Facebook jelisinde.

Onyń aıtýynsha, oqýshylar bilimindegi olqylyqtardyń ornyn toltyrý jáne oqý baǵdarlamalaryn beıimdeý boıynsha sharalar josparlanǵan.

Sonymen qatar 5 myń mektepti modernızatsııalaý, pándik kabınettermen jabdyqtaý, qosymsha bilim berýge memlekettik tapsyrys bólý josparda bar.

«Pedagogterdiń biliktiligin arttyrýǵa erekshe nazar aýdarylady. Álem qaryshtap damyp kele jatqanda bul óte mańyzdy. Muǵalimderdiń biliktiligin qazirgideı bes jylda bir ret emes, úsh jylda keminde bir ret arttyrý kózdeletin bolady. Prezıdent sondaı-aq pedagogterdi tegin kýrstarmen tolyq qamtamasyz etý qajettigi týraly málimdedi», - deıdi A. Aımaǵambetov.

Aıta keteıik, Memleket basshysy bıylǵy Joldaýynda 2025 jylǵa deıin elimizde 1000 mektep salý mindetin qoıdy.