«Myń bala» ulttyq olımpıadasyna qatysýshylardy tirkeý bastaldy
«24 naýryzǵa deıin aýyl oqýshylaryna arnalǵan «Myń bala» ulttyq olımpıadasyna qatysýshylardy tirkeý júrgiziledi. Olımpıadaǵa elimizdegi aýyl mektepterinde sońǵy eki jyl boıy bilim alyp jatqan 5 jáne 6-synyp oqýshylary qatysa alady», delingen habarlamada.
Jeńimpazdar elimizdiń daryndy balalarǵa arnalǵan jetekshi bilim berý uıymdarynda jáne Elbasy Akademııasy janyndaǵy «Birge Oqý» onlaın mektebinde oqýǵa múmkindik alady.
Aıta keterligi, «Myń bala» olımpıadasy jyl saıyn aýyl mektepterinde bilim alatyn 5 jáne 6-synyp oqýshylary arasynan 1000 daryndy balany anyqtaýǵa jáne olarǵa elimizdiń eń úzdik bilim oshaqtarynda oqýǵa múmkindik berýge baǵyttalǵan.
Olımpıadaǵa tirkelý myna saıtta ótkiziledi.
Barlyq suraqtar boıynsha 8 800 080 48 48 call-ortalyǵyna habarlasýǵa bolady. Qońyraý shalý tegin.
Eske sala ketsek, byltyr jeltoqsan aıynda aýyl oqýshylary arasynda ótken «Myń bala» olımpıadasynyń jeńimpazdary marapattalǵan edi.