«Myń bala» olımpıadasynyń jeńimpazdary belgili boldy

NUR-SULTAN. QazAqparat - «Myń bala» olımpıadasynyń 5 myń fınalısi Elbasy Akademııasynyń Virge oqý onlaın mektebinde tegin bilim alady. Bul týraly Ortalyq kommýnıkatsııalar qyzmetinde ótken baspasóz máslıhatynda «Elbasy Akademııasy» korporatıvtik qorynyń basqarýshy dırektory Ánýar Janǵozın aıtty, dep habarlaıdy QazAqparat tilshisi.

Onyń atap ótýinshe, aýyldyq jerlerdegi daryndy oqýshylardyń qabiletin damytýǵa jáne qoldaýǵa baǵyttalǵan «Myń bala» olımpıadasy eki jyl ishinde 5-6 synyptaǵy 400 myńnan astam oqýshyny qamtydy.

Bıyl olımpıada alǵash ret onlaın formatta ótti.

«Olımpıadaǵa 5-6 synyptyń 150 myńǵa jýyq oqýshysy tirkeldi. I kezeńge 96 myńnan astam oqýshy qatysty. Alǵashqy kezeńniń nátıjesimen óńirler bólinisinde eń joǵary nátıje kórsetken 5000 fınalıst irikteldi. Olardyń ortasha baly 400 balldan 343 balldy quraǵanyn atap ótý kerek. Bul aýyl oqýshylarynyń joǵary daǵdylyq deńgeıin kórsetedi», - dedi «Elbasy Akademııasy» KQ basqarýshy dırektory.

Ánýar Janǵozınnyń aıtýynsha, II kezeńge 5 myń fınalıst ótip, aýyldyń eń qabiletti myń oqýshysy jeńimpaz atandy.

Olar endi elimizdiń daryndy balalarǵa arnalǵan jetekshi mektepterinde, atap aıtqanda, Respýblıkalyq fızıka-matematıka mektebinde, «Bilim-Innovatsııa» lıtseılerinde jáne «Daryn» mamandandyrylǵan mektepterinde, Elbasy Akademııasy Birge Oqý onlaın mektebinde oqıdy.

QR Bilim jáne ǵylym mınıstrliginiń qoldaýymen Nursultan Nazarbaev Qory men Elbasy Akademııasy uıymdastyrǵan olımpıadanyń 5 myń fınalısi Virge oqý onlaın mektebinde tegin oqıdy.

Onlaın mektepte elimizdiń eń úzdik ustazdary aýyl oqýshylary úshin qosymsha sabaq beredi.

Sabaqtar sınhrondy jáne asınhrondy formatta uıymdastyrylǵan. Oqý protsesi eki aýysymda júrgiziledi. 2020-2021 oqý jylynda 9 myńnan astam onlaın sabaq ótken.

Sabaq jıiligi: aptasyna 5 saǵat. Sabaqtyń uzaqtyǵy: 1 saǵat. Qazir onlaın mektepte 42 muǵalim sabaq beredi.

Olar: óńirlik Nazarbaev Zııatkerlik mektepteriniń, Respýblıkalyq fızıka-matematıka mektebiniń jáne Nur-Sultan qalasy lıtseıleriniń ustazdary.

«Biz dástúrli oqytýdy onlaın-analogtarmen almastyrýdy maqsat etpeımiz. Sonymen qatar, onlaın oqytý dástúrli mektepti sátti tolyqtyra alatynyn kórdik. Sondyqtan, jaqyn arada biz 10-11 synyp oqýshylaryn tek aýyl mektepterine ǵana emes, qala mektepterine de oqytý úshin jobany keńeıtýdi josparlap otyrmyz jáne qosymsha 10 myńǵa jýyq oqýshyny, onyń ishinde kóp balaly jáne az qamtylǵan otbasylardan shyqqan balalardy da qamtýǵa daıynbyz. Tildik quzyretter men matematıkalyq saýattylyq daǵdylaryn damytýǵa basa nazar aýdarylady. Sondaı – aq, bitirýshi synyp oqýshylaryn daıarlaý úshin UBT-nyń mindetti pánderin engizý múmkindigin qarastyramyz», - dedi Ánýar Janǵozın.