«Myń bala» olımpıadasy: BQO oqýshylary respýblıka boıynsha kóshbasshylar qatarynda
BQO bilim basqarmasy basshysynyń orynbasary Záýre Ǵumarovanyń óńirlik kommýnıkatsııalar qyzemeti alańynda ótken brıfıngide málim etkenindeı, aýyl oqýshylaryna arnalǵan «Myń bala» ulttyq olımpıadasy bıyl úshinshi ret uıymdastyrylyp otyr.
«Myń bala» olımpıadasynyń maqsaty – aýyldyq jerdegi oqýshylardyń qabilet-qarymyn damytý úshin barynsha jaǵdaı jasaý.
-Qazaqstan Prezıdenti Qasym-Jomart Toqaev balalar jyly dep jarııalaǵan bıylǵy jyly shalǵaı aýyldardan kelgen oqýshylardy qoldaý ózekti bola tústi, - dedi basqarma basshysynyń orynbasary.
Z.Ǵumarovanyń sózine qaraǵanda, 2020 jyly oblystan olımpıadanyń bastapqy satysyna 9 496 oqýshy qatysyp, sonyń 200-i ekinshi kezeńge ótti. 92 shákirt, sonyń ishinde 5-synyptan 49, 6-synyptan 43 oqýshy jeńimpaz atandy. 6- synyptan ozyp shyqqandardyń 31-i respýblıkalyq fızıka- matematıka, oblystyq mamandandyrylǵan daryndy
balalarǵa arnalǵan mektepterde jáne Nazarbaev zııatkerlik mektebinde bilim alýda. Qalǵan 12 fınalıst Elbasy akademııasy janyndaǵy «Birge oku» onlaın mektebinde tegin bilim alý quqyǵyna ıe boldy.
Sol sekildi 2021 jyly 4 964 oqýshynyń 213-i ekinshi kezeńge ótip, 51-i jeńimpaz atandy. Qazirgi kezde 6-synyp boıynsha úzdik atanǵan 29 shákirt daryndy balalarǵa arnalǵan mektepterde oqyp júr.
«Jalpy, elimiz boıynsha eki jyl ishinde olımpıadaǵa aýyl mektepterinen 445 myńnan astam oqýshy qatysyp, 4 320 bilim ordasy qamtyldy. 638 oqýshy jetekshi mektepterde tegin oqýǵa múmkindik aldy. 6 100 shákirt onlaın mektepte oqıdy. Bıyl da aýyl mektepteri oqýshylarynyń olımpıadaǵa qatysýy úshin barlyq jaǵdaı jasalyp otyr», dedi Z.Ǵumarova.
Brıfıngide «Daryn» qosymsha bilim ortalyǵynyń dırektory Gúlsin Dúısenǵalıevanyń tolyqtyrǵanyndaı, olımpıadaǵa qatysý úshin 1000bala.elbasyacademy.kz
saıtynda tirkelý qajet. Tirkeý 19 aqpannan 20 naýryzǵa deıin júrgiziledi.
Olımpıada eki kezeńnen turady.
Birinshi kezeń onlaın formatta ótedi. 4-8 sáýir aralyǵynda tańǵy 9:00-den keshki 21:00-ge deıin 1000bala.elbasyacademy.kz saıtynda testileýden ótý kerek.
Testileý eki bólimnen turady: «Logıkalyq oılaý» jáne «Keńistiktik oılaý». Testileý 40 suraqtan turady, shamamen 60 mınýtty alady.
Testileýden smartfonnan, planshetten nemese ınternet jelisine qosylǵan kompıýterden ótýge bolady. Sondaı-aq, qatysýshylar testileýden óz mektepterinde nemese «Daryn» ortalyqtarynda óte alady.
Óńirler boıynsha eń joǵary qorytyndy ball jınaǵan bes myń oqýshy olımpıadanyń ekinshi kezeńine ótedi.
«Olımpıadanyń ekinshi kezeńi 27-29 sáýir aralyǵynda ótedi.
Testileý «Ustudy» óńirlik testileý ortalyqtarynyń bazasynda ótedi (Oralda Abaı dańǵyly, 103 ǵımarat «Akvarıým» saýda úıi). Oqýshylardyń kompıýterlik testileý ótkiziletin oryndarǵa kelýi mindetti. Bul kezeńde qatysýshylar kelesi pánder boıynsha akademııalyq bilimdi baǵalaý úshin kompıýterlik testileýden ótedi: matematıkalyq saýattylyq, qazaq tilinde oqıtyn oqýshylarǵa arnalǵan qazaq tili, orys tilinde oqıtyn oqýshylarǵa arnalǵan orys tili, aǵylshyn tili, jaratylystaný. Testileý 100 suraqtan turady jáne 150 mınýtqa sozylady. Ótken jyldyń jeńimpazdary da baq synaı alady, olarǵa birden testileýdiń II kezeńinen bastap qatysý quqyǵy beriledi. Oqýshylarǵa daıyndalý úshin birinshi jáne ekinshi kezeń tapsyrmalarynyń úlgisi daıyndaldy, olardy 1000bala.elbasyacademy.kz saıtynda
júktep alýǵa bolady. Apellıatsııa kózdelmegen. Olımpıadaǵa qatysý tegin. Eger olımpıadaǵa qatysý úshin aqshalaı qarajat usynǵanǵa nemese alyp jatqanyna kýá bolsańyz, bul týraly 8 800 080 48 48 nómiri boıynsha habarlasýǵa bolady, qońyraý shalý tegin. Osy nómir boıynsha siz jobaǵa qatysty týyndaǵan suraqtar boıynsha qońyraý shalyp, jaýap ala alasyz», dedi G.Dúısenǵalıeva.
