«Myń bala» 2012 jyldyń otandyq kıno álemindegi basty oqıǵa bolmaq
ASTANA. 17 sáýir. QazAqparat - Otandyq kıno álemine «Reketır», «Adasqandar», «Lıkvıdator» fılmimen tanymal rejısser Aqan Sataevtyń «Myń bala» kartınasy jol ashýda.
Tarıhı týyndy qazaq kınosynyń sońǵy on jylyndaǵy iri jobasy dep tanylady. Bul týraly Mádenıet jáne aqparat mınıstrliginiń saıtynda jarııalandy.
«Kınony tamashalaǵan kórermen jońǵar shabýylyn bastan ótkergendeı bolady», -deıdi rejısser. Oqıǵa jelisi áıgili «Ańyraqaı» shaıqasyn kórsetedi. Basty keıipker Sartaıdyń jasy 15-te. Bir adym jerin jońǵarlardan saqtap qalý úshin myńdaǵan jetkinshekten jasaq quryp, atyn «Myń bala» dep qoıady. Keıinnen jas jaýyngerler Ábilhaıyr han bastaǵan úlken áskerı jasaqqa enedi. Basty keıipkerler jas balalar. Kishkentaıynan ata-anasyz qalǵan. Biraq keıinnen ózderi uıymdasyp, jońǵarlarǵa qarsy shaıqasqa shyǵady. Akterlardy tańdaý barlyq aımaqtarda júrgizilgen. Oǵan 15-16 jastaǵy birneshe myń jasóspirim qatysty. Túsirilim Qapal arasan, Qapshaǵaı, Sharyn shatqaly, Almatydaǵy taý bókteri sııaqty tabıǵaty sulý eldi mekenderde ótti. Qoıýshy -operator - Hasan Qydyrálıev, stsenarıin jazǵan Jaıyq Syzdyqov pen Muhammed Mamyrbaev.
Aıta keterligi, stsenarıdiń 10-ǵa jýyq jobasy bolǵan. Ony jazýǵa shet eldik mamandar da at salysypty. Jalpy týyndyny jasaýǵa 14 elden kelgen kıno óndirisiniń mamandary eńbek etti. Fılm Táýelsizdigimizdiń 20 jyldyǵyna arnalady, qazaq halqynyń azattyq úshin kúresip, qansha qıyndyqtarǵa tózip, ulan baıtaq jerimizdi, tilimizdi, dilimizdi qalaı saqtap qalǵandyǵy-fılmniń ón boıynyń leıtmotıvi ispetti. Al shaıqasqa qatysqan «myń balanyń» kórsetken erligi men eńbeginiń ózi birneshe fılmge turarlyq.
