«Myń alǵys» qaıyrymdylyq kontserti: 3 kópbalaly anaǵa páter berildi
«Sharanyń maqsaty - «Qazaq radıosynyń» «Myń alǵys» áleýmettik radıohabaryna qatysqan kómekke zárý, syrqatqa shaldyqqan keıipkerlerdiń muń-muqtajyn kóppen birge kóterip, qarjylaı járdem kórsetý. Osyǵan oraı, «Qazaq radıolary» seriktestigi 11 aqpannan bastap «Qaıyrymdylyqtan qalys qalma! Alǵysqa bólen!» radıomarafonyn jarııalaǵan bolatyn. Qaıyrymdylyq sharasynan túsken qarajat «Myń alǵys» habarynyń úsh keıipkeri - Jansaıa Pishenbaev, Jandos Berikuly, Tolǵanaı Baýyrjanqyzynyń em-domyna tabystalady. Osy ıgi sharanyń bastaýynda turǵan «QAZAQ RADIOLARY» ujymy izgi amaldy áýeli ózderinen bastap, bir kúndik jalaqylaryn keıipkerlerimizdiń emine aýdardy. Sonymen qatar, Almatyda aqpan aıynyń 23 kúni Qurmanǵazy atyndaǵy Qazaq Memlekettik akademııalyq orkestriniń kontsert zalynda qaıyrymdylyq keshin uıymdastyrdy. Odan túsken 1,5 mln teńge kólemindegi qarajat «Myń alǵys» habarynyń keıipkeri Bolat Tuńǵatarulyna tabystaldy» delingen habarlamada.
«Alǵys aıtý» kúnine oraı ótken kontserttik keshtegi jáshikterden jınalǵan qarajat toqishek transplantatsııasyn kútip júrgen Ádilet Arystan degen búldirshinge berilmek. Kesh sońynda «Ýaqyp» korporatıvtik qorynyń prezıdenti Qaırat Ázimov Ádilettiń operatsııasyna jetpeı turǵan 2.5 mln teńgeni óz moınyna alatynyn aıtty. Byltyrǵy «Myń alǵystyń» keıipkeri bolǵan Arman Ardaquly esimdi búldirshinge qajetti ota shyǵynyn dintanýshy-ǵalym Qaırat Joldybaıuly kóterip alǵan bolatyn.
«Qaıyrymdylyq kesh aıasynda kómekke muqtaj kópbalaly analarǵa 3 páterdiń kilti tabystaldy. Bular - «1000 teńgege baspana» uranymen kópbalaly jalǵyzbasty analarǵa úı turǵyzyp berýmen aınalysyp júrgen «Hareket» qaıyrymdylyq qorynyń 76,77,78-shi baspanasy. Budan bólek, eki bólmeli páterdiń kiltin «Asyl adam» qaıyrymdylyq qory tabystady. Páter kilti «Ózgelerge kómektesý arqyly ózińe kómektes» aktsııasy boıynsha myń teńgemen qaıyrymdylyq jasaǵan jalǵyzbasty ananyń qyzy Marına Maksımenkoǵa buıyrdy. 2017 jyldyń sáýir aıynda «Jan jylýy» degen atpen efırge shyqqan «Myń alǵys» radıohabary arqyly keıipkerlerge osy ýaqytqa deıin 56 000 000 teńge kóleminde kómek kórsetildi» dep málim etti radıonyń baspasóz qyzmetinen.
Jaqsylyqtyń jarshysy bolý muqtaj jandarǵa kómekpen ǵana ólshenbeıdi. Bir-birinen kóz jazyp qalǵan, jaqyndaryn joǵaltqandardy da tabystaý - ult radıosynyń paryzy ispetti. Osy maqsatta 2017 jyldyń qazan aıynan beri talmaı qyzmet etip kele jatqan «Barmysyń, baýyrym?» radıohabary efırge 70 habar shyǵaryp, 703 hat-habar alyp, 90 adamdy anyqtap, bir-birimen tabystyryp úlgerdi. Kesh barysynda 40 jyl bir-birin kórmegen áskerdegi dostar, 50 jyl kórispegen ana men bala, 15 jyl boıy urpaǵyn izdep júrgen qarııa et jaqyndarymen qaýyshty.
