Myltyq ustap júrgen ákim xalyqtyń záresin ushyrdy

Redaktsııamyzǵa xabarlasqan osy aýyldyń turǵyny da jergilikti atqaminerdiń myltyq ustap kelgenin jetkizdi. QazAqparat tilshisi ákimge de xabarlasyp, oqıǵanyń mán-jaıyn bilgen bolatyn.

"Basynda kórshiniń kelinshegi bizge kelip, "ıtińiz qyzymdy qaýyp aldy, dep aıǵaı-shý shyǵardy. Bilmeımin, ıt qaýyp alsa, medıtsınalyq anyqtamany kórsetetin edi, emge aqsha talap etetin edi. Ol joq. Sosyn sol kúni qyzynyń dál úıimizdiń janynan ótip bara jatqanyn kórdik. Qup, ol qyzdyń ıtimizdiń qapqan-qappaǵanyn eshkim bilmeıdi. Biraq týra bir saǵattan keıin úıimizdiń aldyna bes adam topyrlap keldi. Іshinde úsh er adam boldy. Bireýi shyttaı kıingen, basynda qarakúzen bórki bar, qolynda myltyq. Siz ózi kimsiz? dep surasam, "Men ákimmin" dep jaýap berdi. Sonda esime tústi, bir ret jazda kórshilermen birge baryp, jol máselesin aıtqanda ákimniń ózi bárimizdi tyńdap shyqqan. Biraq áli kúnge deıin nátıje joq. Men aıtamyn, sizderde ıt atýdan basqa jumys joq pa?", - deıdi Qosshy aýylynyń turǵyny Lıazzat Dúısembaeva.

QazAqparat tilshisi Astanaǵa irgeles jatqan Qosshy aýyldyq okrýgynyń ákimi Dinmuxammed Qalıevke xabarlasyp, oqıǵanyń mán-jaıyn bildi. Aýyl basshysy ol úıge barǵanyn jáne qolynda myltyq ustaǵanyn moıyndap otyr.

"Ol jerde kórshisinen bos júrgen ıt qyzyn qaýyp aldy degen aryz tústi. Biz aryz boıynsha sol jerge bardyq. Itti atqan joqpyn. Onymen "Tórt túlik" degen uıym aınalysady. Sosyn atqan kúnniń ózinde kádimgideı oqpen emes, uıyqtatatyn dárimen atady. Sonda biz baryp, ıttiń ıesine eskertý jasap ketkenbiz. Iá, mashınadan túskende myltyqty qolymda ustadym. "Tórt túliktiń" adamdary meniń mashınammen bardy ǵoı. Sol kezde alyp shyqqanmyn. Biraq ıtti atqan joqpyz", - dep atap kórsetti Qalıev.

Degenmen, "ákim myltyq ustap, ıt atyp júr" degendi estigen sol úıdiń keıýanasy qatty qorqyp qalǵan. Záresi ushyp, qan qysymy kóterilgen. Búgin ony aýrýxanaǵa jatqyzdy. "Al anaý bir jýas ıtimizdi bireý bastan uryp óltirip ketken", - deıdi Lıazzat Dúısembaeva.