Myqty saıası partııalardy damytý kerek – Senat tóraǵasy

NUR-SULTAN. QazAqparat – Myqty partııa, damyǵan azamattyq qoǵam, yqpaldy buqaralyq aqparat quraldary bolýy kerek. Bul týraly Senat tóraǵasy Máýlen Áshimbaev málim etti, dep habarlaıdy QazAqparat tilshisi.

«Naqty saıası básekelestik bolýy úshin birneshe talapty oryndaý qajet. Birinshiden, myqty saıası partııalardy damytý kerek, ıaǵnı osy partııalar arasynda saıası básekelestik bolǵany durys. Ekinshiden, qýatty azamattyq qoǵamdy qamtamasyz etý mańyzdy. Adamdar ózderiniń pikirin, ustanymyn emin-erkin bildirýi kerek», - dedi M. Áshimbaev Senattyń jalpy otyrysynan keıin tilshiler saýalyna jaýap bere otyryp.

Sonymen qatar ol elimizde yqpaldy buqaralyq aqparat quraldarynyń bolǵany mańyzdy sanalatynyn, alaıda olar popýlızmge jol bermeýi kerek ekenin aıtty.

«Sondyqtan myqty partııa, damyǵan azamattyq qoǵam, yqpaldy buqaralyq aqparat quraldary demokratııalyq reformalar jolymen ilgerileý úshin mańyzdy talap bolyp otyr», - dedi Senat tóraǵasy.

Budan buryn habarlanǵandaı, Senat tóraǵasy aldaǵy saılaýda Parlamentke, Úkimetke jańa adamdardyń kelýine múmkindik bolatynyn aıtty.