Myqty kóshbasshy Qazaqstannyń ekonomıkalyq damýyn aldyn ala anyqtaıdy - ázerbaıjandyq parlamentshiler
BAKÝ. QazAqparat - Nursultan Nazarbaevtyń jeńisi Qazaqstan basshysynyń halyq arasyndaǵy bedeli men oǵan degen senim deńgeıiniń joǵary ekenin dáleldedi.
Bul týraly Ázerbaıjan Mıllı Medjlısiniń (Parlamenti) mádenıet boıynsha komıtetiniń tóraǵasy, depýtat Nızamı Djafarov aıtty.
«Qazaqstan biz úshin jaqyn el dep atap ótkim keledi. Al Nursultan Nazarbaevty Ázerbaıjanda da qurmetteıdi. Ol shynymen ulttyń naǵyz lıderi. Ol búkil túrik áleminiń lıderi. Muny bizdiń memleketterimizdiń basshylary men halqy da moıyndaıdy», - dedi N.Djafarov. «Bizdiń ulttyq lıderimiz Geıdar Alıev Nursultan Ábishulymen dostyq qarym-qatynasta bolǵan, al prezıdent Ilham Alıev Qazaqstan basshysyn qurmettep, eki el arasyndaǵy saıası baılanysty nyǵaıtý jolynda jumys jasap jatyr. Qazaqstan halqy durys tańdaý jasady. Eldiń damýy Nursultan Nazarbaevpen baılanysty», - dep atap ótti ázerbaıjandyq parlamentshi. Sonymen qatar depýtat N.Djafarov túrik elderi Qazaqstan men onyń basshysynan kóp nárseni úırenetinin aıtty. «Soǵys, ultaralyq qaqtyǵys, ekonomıkalyq daǵdarys bolyp jatqan elderge qarańyzdar. Bul myqty lıderdiń bolmaýynyń saldary. Qazaqstanda mundaı lıder bar. Sondyqtan ol eldiń ekonomıkalyq damý jolyn aldyn ala anyqtap, el azamattarynyń jaǵdaıyn jaqsartyp jatyr», - dep túıdi N.Djafarov.
