Mıanmadaǵy jer silkinisi: júzdegen adam joǵalyp, 2400-ge jýyǵy jaralandy

ASTANA. KAZINFORM — Mıanmanyń ortalyǵyndaǵy Mandalaı qalasynda magnıtýdasy 7,7 bolǵan joıqyn jer silkinisi saldarynan júzdegen adam qaza tapty. Jerasty dúmpýleri kórshiles Taılandtyń Bangkok qalasyna deıin sezildi, dep habarlaıdy Euronews.

Mıanmadaǵy 7,7 magnıtýdaly joıqyn jer silkinisinen qaza tapqandar sany 1000-nan asty, al bılik ókilderi bul sannyń edáýir artýy múmkin ekenin eskertip otyr.

Jer silkinisi juma kúni jergilikti ýaqyt boıynsha túske taıaý Mıanmanyń ortalyǵyndaǵy Mandalaı qalasynda bolyp, álemniń eń kedeı elderiniń birinde aýqymdy qıraýǵa ákeldi.

Azamattyq soǵys jaǵdaıyndaǵy Mıanmada aqparat qatań baqylanatyndyqtan, apattyń naqty aýqymy birden belgili bolǵan joq.

– Qaza tapqandar men jaralanǵandar sanynyń ósýi yqtımal, – dep málimdedi Mıanma áskerı úkimetiniń basshysy, aǵa general Mın Aýng Hlaıng telearna arqyly sońǵy málimetterdi jarııalap.

Qazirgi ýaqytta júzdegen adam iz-túzsiz joǵalyp ketken dep eseptelse, jaraqat alǵandar sany 2400-ge jýyq.

Taıland astanasy Bangkokta da keminde 10 adam qaza tapty. Bul qala epıtsentrden 1330 km qashyqtyqta ornalasqan. Qurylysy júrip jatqan kópqabatty ǵımarattyń opyrylýy saldarynan onnan astam adam jaraqat alyp, 100-den astamy iz-túzsiz joǵaldy.

Mıanmadaǵy jer silkinisinen keıin 50-den astam aftershok tirkeldi, olardyń eń kúshtisi 6,4 magnıtýdaly bolǵan.

AQSh Geologııalyq qyzmetiniń baǵalaýy boıynsha, qaza tapqandar sany 10 000-nan asýy múmkin.

Mandalaıda birneshe ǵımarat, sonyń ishinde qalanyń eń iri býdda ǵıbadathanalarynyń biri qıraǵan. Neıpıdo qalasynda qutqarýshylar memlekettik qyzmetkerler turatyn ǵımarattardyń qırandylary astynan adamdardy shyǵaryp jatyr.

Mıanma úkimeti qan donorlyǵyna suranys joǵary ekenin habarlady. Burynǵy bılik sheteldik kómekti qabyldaýǵa asyqpaǵanymen, Mın Aýng Hlaıng bul joly halyqaralyq kómekti qabyldaýǵa daıyn ekenin málimdedi.

BUU alǵashqy kómek retinde 5 mıllıon dollar bóldi. AQSh prezıdenti Donald Tramp Vashıngtonnyń da kómek kórsetýge daıyn ekenin aıtty, alaıda keıbir sarapshylar onyń ákimshiligi sheteldik kómekti qysqartqanyn eskerip, bul ýádeniń oryndalýyna kúmánmen qaraıdy.

Malaızııa, Reseı jáne Qytaı syndy elder zardap shekken aýdandarǵa qutqarýshylar jiberdi.

Alaıda qıraǵan joldar, qulaǵan kópirler men jarylǵan bógetter týraly habarlamalar qutqarý jumystarynyń qıyndaıtynyn kórsetip otyr.

Aıta keteıik, juma kúni Mıanmada magnıtýdasy 7,9 bolatyn taǵy bir jer silkinisi tirkelgen.

Taılandta jer silkinisine baılanysty evakýatsııa jumystary júrgizildi, Bangkokta kópqabatty ǵımarat qulady. Eldiń premer-mınıstri Bangkokty «tótenshe jaǵdaı aımaǵy» dep jarııalady.

Mıanmada da apattan zardap shekken aımaqtarda tótenshe jaǵdaı engizildi.

Qazirgi tańda Taılandta 4 457 qazaqstandyq týrıst bar.

Qazaqstan Syrtqy ister mınıstrliginiń málimetinshe, elshilikterge otandastardan kómek suraý týraly ótinish túsken joq.