Mıanmadaǵy jer silkinisiniń boljamdy sebebi ataldy

ASTANA.KAZINFORM  - Ǵalymdar Live Science basylymyna bergen suhbatynda Ońtústik-Shyǵys Azııadaǵy jer silkinisiniń sebebin 2023 jyly Túrkııada bolǵan joıqyn jer  silkinisimen salystyra otyryp túsindirdi.

Mıanmada 28 naýryz, juma kúni magnıtýdasy 7,7 jáne 6,4 baldyq jer silkinisi boldy.

– Bangkok Mıanmadaǵy «apat aımaǵynan aıtarlyqtaı qashyqta» bolǵanymen, «jer silkinisi óte qýatty boldy jáne onyń osy qashyqtyqta sezilgeni tańqalarlyq emes», - dedi Stenford ýnıversıtetiniń geofızıka professory Gregorı Beroza Live Science-ke.

Gımalaıdyń ońtústiginde ornalasqan Mıanma seısmıkalyq belsendi aımaq, ol kúshti jer silkinisterimen tanymal, deıdi Mıchıgan ýnıversıtetiniń geologııa professory Ben van der Plıýım Live Science-ke.

– Munyń sebebi - Úndi sýbkontınentiniń shamamen 100 mıllıon jyl boıy soltústikke qaraı jyljyp kele jatqan Úndi taqtasynda ornalasqany, - dep túsindirdi Ben van der Plıýım. - Biraq shamamen 40 mıllıon jyl buryn Úndistan Eýrazııalyq taqtaǵa qosylyp, soltústikke qaraı jyljýdy jalǵastyrdy.

Ol sońǵy ret magnıtýdasy 7,7 bolatyn jer silkinisiniń kúshti bolǵany sonsha, jerdiń kóldeneńinen birneshe metrge aýysýy tańǵaldyrmaıtynyn aıtty.

– Bul shynymen qýatty jer silkinisi. Mundaı jaǵdaılar jıi bola bermeıdi, - dedi professor.

Jer silkinisteri taıaz bolǵandyqtan, olardy 2023 jyly Túrkııany dúr silkindirgen 7,8 jáne 7,5 baldyq jer silkinisterimen salystyrýǵa bolady, deıdi jer silkinisi jáne jer qurylymy boıynsha mamandanǵan Iel ýnıversıtetiniń professory Djeffrı Park.

Aıta keteıik, Mıanma bıligi 28 naýryz, juma kúni bolǵan 7,7 jáne 6,4 baldyq joıqyn jer silkinisiniń saldarynan 1 644 adam qaza taýyp, 3 408 adam jaralanǵanyn habarlady.