Mıanmadaǵy jer silkinisinen qaza tapqandar sany 3,5 myńnan asty

ASTANA. KAZINFORM – Mıanmadaǵy 7,7 jáne 6,4 baldyq qos jer silkinisinen qaza tapqandar sany 3564-ke jetti. Bul týraly Anadoly jazdy.

Mıanmanyń áskerı ákimshiligin usynatyn organ – Memlekettik ákimshilik keńes (SAC) bul máselege qatysty málimdeme jasady. Zardap shekkenderdiń sany 5012 adamǵa jetkeni atap ótildi.

Qutqarý toptary iz-túzsiz joǵalǵan 200-den astam adamdy izdeýdi jalǵastyryp jatyr. Mıanma órtke qarsy qyzmeti Mandalaı qalasynda qulaǵan ǵımarattyń qırandylarynan on adamnyń máıiti shyǵaryldy dep habarlady.

Sonymen qatar Sıngapýr, Malaızııa jáne Úndistannyń qutqarý toptary jumystaryn aıaqtap, úılerine oralǵany habarlandy. 

Mıanmada 28 naýryzda bolǵan joıqyn jer silkinisinen keıin magnıtýdasy 2,8-den 7,5-ke deıingi 98 jer silkinisi tirkelgen. Bul týraly seısenbide eldiń Meteorologııa jáne gıdrologııa departamenti habarlady.

Sınhýa agenttiginiń habarlaýynsha, Memlekettik ákimshilik keńes Mıanmadaǵy 7,9 baldyq jer silkinisinen qaza tapqandar sany 3600-ge jetken, 5017 adam jaralanǵan, 160 adam iz-túzsiz joǵalyp ketkenin málimdegen.

Aıta keteıik, Mıanmadaǵy 40 gradýs ystyq kún raıy qutqarý jumystaryn qıyndatyp jatqanyn jazǵan edik.