Mıanmadaǵy jer silkinisinen qaza tapqandar sany 2 myńnan asty

ASTANA. KAZINFRM – 28 naýryzda Mıanmada bolǵan magnıtýdasy 7,7 jáne 6,4 baldyq eki kúshti jer silkinisi saldarynan 2056 adam qaza taýyp, 3900 adam jaraqat aldy, dep habarlaıdy Sınhýa aqparat agenttigi eldiń áskerı bıligine silteme jasap. 

Jergilikti bıliktiń málimetinshe, 270-ke jýyq adam áli iz-túzsiz joǵalǵan. Qıraý eldiń ortalyq aımaǵynyń kóp bóligine, ásirese Sıkaın aımaǵyna áser etti.

Jerasty dúmpýleri kórshi Taılandta da sezildi. Bangkokta qaza tapqandar sany 17-ge, jaralanǵandar sany 32-ge jetti, taǵy 83 adam iz-túzsiz joǵalǵan.

Aýqymdy qıraýǵa baılanysty bılik qurbandar sanynyń odan ári artýy múmkin dep boljap otyr.

Aıta keteıik, buǵan deıin Mıanma premer-mınıstri bir aptalyq ulttyq aza tutý jarııalaǵanyn jazdyq.

Sondaı-aq, Mıanmada jeksenbi kúni tańerteń magnıtýdasy 5,1 bolǵan jer silkinisi tirkeldi.