Mıanmadaǵy jer silkinisinen qaza tapqandar sany 1600-den asty

ASTANA. KAZINFORM – Mıanma bıligi 28 naýryz, juma kúni bolǵan 7,7 jáne 6,4 magnıtýdaly joıqyn jer silkinisteriniń saldarynan 1644 adamnyń qaza taýyp, 3408 adamnyń zardap shekti, dep habarlaıdy BBC.

Keminde 1644 adam qaza taýyp, 3408 adam jaraqat aldy, taǵy 139 adam habar-osharsyz ketkender tiziminde.

Taıland bıliginiń málimetinshe, Bangkok mýnıtsıpalıteti jergilikti ýaqytpen 18:30–da (Grınvıch boıynsha 11:30) 10 adamnyń qaza bolǵanyn, 42 adamnyń jaraqat alǵanyn jáne 78 adamnyń iz-túzsiz joǵalǵanyn habarlady.

Qutqarýshylar úıindilerdi arshýdy jalǵastyrǵan saıyn qurbandar sanynyń artýy múmkin.

Mıanmadaǵy ekinshi iri qala — Mandalaıdaǵy qutqarý qyzmetiniń ókili BBC-ge «zııan óte úlken» ekenin aıtty. Qutqarý jumystary túnde de jalǵasqan, alaıda aftershoktar jaǵdaıdy qıyndatqan.

AQSh Geologııalyq qyzmetiniń (USGS) málimetinshe, Mıanmada 28 naýryz, juma kúni 7,7 jáne 6,4 magnıtýdaly jer silkinisteri boldy.

USGS málimetinshe, alǵashqy, kúshtirek jer silkinisi juma kúni jergilikti ýaqytpen 12:50–de, 10 shaqyrym tereńdikte, Mıanmanyń ortalyq bóliginde tirkelgen. Al ekinshisi odan 12 mınýt ótken soń bolǵan.

Jer silkinisiniń epıtsentri Mandalaı qalasynan (eldegi ekinshi iri qala, halqy — 1,2 mln adam) soltústik-batysqa qaraı 16 km qashyqtyqtaǵy Sagaın eldi mekeniniń mańynda ornalasqan.

Bul aımaq Mıanma astanasy Neıpıdodan shamamen 100 km soltústikte jatyr.

Jerasty dúmpýleri Taıland pen Qytaıda da sezildi.

Aıta keteıik, juma kúni Mıanmada magnıtýdasy 7,9 bolatyn taǵy bir jer silkinisi tirkelgen.

Taılandta jer silkinisine baılanysty evakýatsııa jumystary júrgizildi, Bangkokta kópqabatty ǵımarat qulady. Eldiń premer-mınıstri Bangkokty «tótenshe jaǵdaı aımaǵy» dep jarııalady.