Taılandtaǵy jer silkinisi: týroperatorlarǵa evakýatsııalaý týraly ótinish túsken joq

ASTANA. KAZINFORM – Bul týraly QR azamattarynyń shyǵý týrızmi salasyndaǵy quqyqtaryn kepildendirý júıesinen málim boldy.

- Mıanmada 7,7 magnıtýdaly jer silkinisi bolǵanyna baılanysty QR azamattarynyń shyǵý týrızmi salasyndaǵy quqyqtaryn kepildendirý júıesiniń ákimshisi «Týrıstik Qamqor»mekemesiniń habarlaýynsha, Andaman teńizi jaǵalaýyndaǵy (Phýket, Kao Lak, Krabı) jáne Sıam shyǵanaǵyndaǵy (Pattaııa, Hýa Hın, Raıong, Ko Chang jáne Samýı araldary) kýrorttardaǵy jaǵdaı turaqty, dúmpýler tirkelgen joq,- deligen habarlamada.

Sonymen qatar onda Bangkok áýejaıynda ýaqytsha ushý-qoný toqtatylǵan bolatyn, qazir áýejaı qalypty jumys istep turǵany aıtylǵan.

- Qazirgi ýaqytta Taılandta 4457 qazaqstandyq týrıst bar. QR azamattarynyń quqyqtaryn kepildendirý júıesiniń ákimshisine nemese júıege qatysýshy týroperatorlarǵa evakýatsııalaý týraly ótinishter túsken joq, - dep habarlandyryldy.

Osyǵan deıin Bangkoktaǵy Sývarnabhýmı áýejaıy Mıanmanyń ortalyǵynda bolǵan 7,7 baldyq kúshti jer silkinisi jáne kórshiles Taılandtaǵy jerasty dúmpýlerinen keıin qalypty jumys istep turǵanyn málimdegen bolatyn.