Mıanmadaǵy jer silkinisi: tarıhı Ava qalasy qırandyǵa aınaldy

ASTANA. KAZINFORM – Jer silkinisi nátıjesinde qalanyń tarıhı bóligi, sonyń ishinde dinı ǵımarattar qatty zaqymdan, dep jazdy Anadoly agenttigi.

Mıanmada bolǵan 7,7 jáne 6,4 baldyq jer silkinisi saldarynan Mandalaı aımaǵyndaǵy tarıhı Ava qalasy aıtarlyqtaı zardap shekti.

Myanmar Now veb-saıtynyń habarlaýynsha, jer silkinisi qalanyń tarıhı bóligin, sonyń ishinde pagodalardy (býddısttik, ındýızmdi nemese daostyq dinı ǵımarattar) jáne dinı ǵımarattardy qatty zaqymdaǵan.

Eldegi ekinshi iri shahar Mandalaıdan 10 shaqyrymdaı jerdegi tarıhı Ava qalasynyń mańyndaǵy tanymal týrıstik Tada-Ý ornynda baqylaý munarasy qulap, úsh adam qaza tapty.

Jer silkinisi qatty sezilgen Tada-Ý aımaǵynda 300-den astam adam kóz jumdy.

Jergilikti turǵyndar aýyldaǵy ǵımarattar qırap, keıbir adamdar áli úıindi astynda qalyp qoıǵanyn habarlaǵan.

28 naýryzda Mıanmanyń ortalyǵynda 7,7 jáne 6,4 baldyq eki jer silkinisi boldy. Jerasty dúmpýlerin Taıland pen kórshiles birqatar elderdiń turǵyndary sezingen.

3 sáýirdegi jaǵdaı boıynsha jer silkinisi saldarynan qaza tapqandar sany 3145 adamǵa, jaralanǵandar sany 4589-ǵa ósti. Іzdeý-qutqarý jumystary jalǵasyp jatyr.  

Eske salsaq, 28 naýryzda Mıanmada 7,9 baldyq jer silkinisi tirkelgeni habarlandy.

Jer silkinisinen zardap shekken óńirlerde tótenshe jaǵdaı jarııalanǵany belgili boldy.

Sol kúni jer silkinisi 50-den astam adamnyń ómirin qıǵany anyqtaldy. Alaıda keshke qaza tapqandar sany 144-ke jetkeni aıtyldy.

Keıinnen Memleket basshysy Mıanma Premer-mınıstri Mın Aýn Hlaınǵa kóńil aıtý jedelhatyn joldady.

Sonymen qatar, Mıanmadaǵy jer silkinisiniń boljamdy sebebi ataldy.

Búgin Mıanma jaǵalaýynda taǵy da jer silkingeni anyqtaldy. Jer silkinisiniń oshaǵy 4,5 mıllıonǵa jýyq adam turatyn ıAngon qalasynan ońtústikke qaraı 142 shaqyrym jerde jatyr. Jer silkinisiniń oshaǵy 10 km tereńdikte ornalasqan kórinedi.