Mıanmadaǵy jer silkinisi: EO kómekke 2,5 mıllıon eýro bóldi

ASTANA. KAZINFORM — Gýmanıtarlyq járdem Mıanmadaǵy kómekke muqtaj adamdardyń ómirin saqtap qalýǵa ári shuǵyl qajettilikterin qanaǵattandyrýǵa kómektesedi, dep habarlady DW saıty Eýrokomıssııanyń baspasóz qyzmetine silteme jasap. 

Mıanmada 700-ge jýyq adam qaza tapqany habarlandy.

Eýropalyq Odaq Mıanmadaǵy jer silkinisinen zardap shekken adamdarǵa bastapqy, shuǵyl kómek retinde 2,5 mıllıon eýro bóledi, delingen juma, 28 naýryzda Eýropalyq komıssııanyń saıtynda jarııalanǵan baspasóz habarlamasynda.

— Bul jańa gýmanıtarlyq kómek qonys aýdarǵan adamdar men qaqtyǵystardan zardap shekken qaýymdastyqtarǵa erekshe nazar aýdara otyryp, Mıanmanyń eń osal turǵyndarynyń ómirin saqtap qalýǵa jáne shuǵyl qajettilikterin qanaǵattandyrýǵa kómektesedi, — delingen habarlamada.

EO jer silkinisiniń saldaryn baǵalaýdy jeńildetý úshin óziniń Kopernık spýtnıktik qyzmetin de paıdalanǵany kórsetilgen.

— Eýrokomıssııa gýmanıtarlyq seriktestermen birlesip, EO-nyń odan ári kómegin jumyldyrý úshin jergilikti jerdegi jaǵdaı men qajettilikterdi baǵalaıdy, - dep habarlaıdy EK baspasóz qyzmeti.

Aǵymdaǵy qarjy bólýdi eskere otyryp, EO Mıanmaǵa gýmanıtarlyq kómek kórsetýdi qarjylandyrýdyń jalpy kólemi 2025 jyly 35 mıllıon eýroǵa jetti, delingen habarlamada. EO 1994 jyly Mıanmaǵa gýmanıtarlyq kómek kórsete bastaǵannan beri jalpy qarjylandyrý 446 mıllıon eýrodan asyp jyǵyldy. 

Reuters eldiń birqatar qalalarynda ınfraqurylymǵa aıtarlyqtaı zııan kelgenin habarlady. El astanasy Neıpıtaýda zardap shekken ǵımarattardyń arasynda 1000 tósektik aýrýhana da bar ekeni belgili bolyp otyr. 

Eske sala keteıik, Mıanmada 7,9 baldyq jer silkinisi tirkelip, qaza bolǵandardyń sany 700-ge jýyqtady.