Mıanmadaǵy jer silkinisi: 40 gradýs ystyq kún raıy qutqarý jumystaryn qıyndatty

ASTANA. KAZINFORM – Mıanmadaǵy joıqyn jer silkinisi aımaǵynda elektr qýaty jıi ajyrap, taza sýdyń berilýi shektelip jatyr, dep habarlaıdy Anadoly.

Sonymen qatar, adam kúshiniń, qarjylyq qoldaýdyń jetkiliksizdigi jáne áskerılerdiń beıbit turǵyndarǵa shabýyldaýy izdeý-qutqarý jumystaryn qıyndatqan.  

28 naýryzda Mıanmanyń ortalyq bóliginde bolǵan 7,7 jáne 6,4 baldyq jer silkinisi 3145 adamnyń ómirin qıdy, taǵy 4589 adam jaraqat aldy.

Apat aımaqtaryndaǵy onsyz da aýyr jaǵdaıdy 40 gradýsqa deıin jetken ystyq aýa raıy ýshyqtyryp otyr.

Sonymen qatar, aýa raıy boljamyna sáıkes aldaǵy aılarda óńirde mýssondyq jaýyn-shashyn kútiledi. Ol jaǵdaıdy odan saıyn nasharlatýy múmkin. Óıtkeni shatyrlardy panalaýǵa májbúr bolǵan jergilikti turǵyndardyń ómirine qaýip tóndiredi. Budan bólek bılik jer silkinisi aımaǵynda juqpaly aýrýlar taralýy múmkin ekenin eskertedi.

Qutqarýshylar áli de birqatar aýyldyq jerge jete almaı otyr, sondyqtan el bıligi qurbandar sany kóbeıýi múmkin ekenin joqqa shyǵarmaıdy.

Eldegi qarýly qaqtyǵys ta apat saldaryn joıýǵa kedergi keltirip jatyr.

Mıanma boıynsha sarapshy jáne Southeast Asia Innovation Forces (FORSEA) negizin qalaýshy Maýng Zarnıdiń sózinshe, jer silkinisi aımaǵynda epıdemııa órshýi múmkin. Zarnı atap ótkendeı, bul birinshi kezekte taza sýdyń jetispeýshiliginen týyndaıdy.

Maman Mıanma tabıǵı apattarǵa, eń aldymen sý tasqyny men joıqyn jer silkinisterine múldem daıyn emes ekenin aıtty.

Zarnı Mıanmaǵa kórshi elderden kelgen kómek izdeý-qutqarý jumystaryn ilgeriletýge yqpal etkenin atap ótti. Ol onnan astam el járdemdesip jatqanyn alǵa tartty. 

Bırma adam quqyqtary jelisiniń (BHRN) dırektory Chjo Vınniń aıtýynsha, jer silkinisi kezinde ǵasyrlar boıy qyzmet etip kele jatqan meshitterge de zaqym kelgen. Chjo qaıtys bolǵandardyń arasynda kóptegen musylman bolǵanyn aıtty, óıtkeni jer silkinisi juma namazy kezinde boldy. Onyń derekterine sáıkes 67 meshit jaramsyz kúıge túsken.

Osyǵan deıin 28 naýryzdaǵy joıqyn jer silkinisinen keıin jabylǵan ıAngon-Mandalaı temirjol jelisi men Mandalaı halyqaralyq áýejaıy qaıta ashylǵany habarlandy.