Poıyz bıletin kimder jeńildikpen satyp ala alady

ASTANA. KAZINFORM – Elimizde belgili bir sanatqa jatatyn azamattar temirjol bıletin 50% jeńildikpen ala alady.

Temirjol kóligi — Qazaqstanda áli kúnge deıin eń tanymal kólik túrleriniń biri. Alaıda, qazirgi zańnama men tasymaldaý erejelerine sáıkes jolaýshylar poıyzdarynda tolyqtaı tegin qatynaý múmkin emes. Degenmen, azamattardyń belgili bir sanaty temirjol bıletterin satyp alý kezinde jeńildikterge ıe bola alady.

Jeńildikke quqyǵy bar azamattar:

I, II jáne III toptaǵy múgedektigi bar adamdar, sondaı-aq múmkindigi shekteýli balalar (rastaıtyn qujattary bolǵan jaǵdaıda).

Múgedektigi bar adamdardy alyp júretin adamdarǵa bılettiń qunynan 50% jeńildik beriledi.
7 jasqa deıingi balalar jeke orynsyz tegin júre alady. Al jeke oryn talap etilgen jaǵdaıda, olarǵa 50%- jeńildik bar.

7 men 15 jas aralyǵyndaǵy oqýshylar úshin 50% jeńildik bar.

Múgedektigi bar adamdar úshin áleýmettik mańyzy bar baǵyttarda 50% mólsherinde jeńildik qarastyrylǵan. «Talgo» tıpti kommertsııalyq poıyzdarda da bul jeńildikter qoldanylady, biraq tek arnaıy kýpelerge ǵana bar jáne erip júrgen adam da jeńildik alady.

Jeńildikpen bılet alý tártibi

Múgedektigi bar adamdar bıletti jeńildikpen onlaın alý úshin ózderiniń JSN jáne múgedektik týraly anyqtama nómirin engizip, rásimdeı alady. Endi burynǵydaı áleýmettik ID kodynyń alty tańbaly nómirin engizýdiń qajeti joq.

— Bıletterdi satyp alý kezinde barlyq derekter avtomatty túrde tekseriledi. Bul temirjol bıletterin satý júıesin QR Eńbek jáne halyqty áleýmettik qorǵaý mınıstrliginiń derekter bazasymen ıntegratsııalaý nátıjesinde múmkin boldy, — deıdi «Jolaýshylar tasymaly» AQ baspasóz hatshysy Narıman Dúısekeev.

Bıletti bilet.railways.kz resmı portalynan, «QTJ bıletteri» mobıldi qosymshasynan nemese basqa ınternet-platformalardan satyp alýǵa bolady.

Esterińizge salaıyq, buǵan deıin Qazaqstanda kim tisin tegin emdete alatynyn, kimder áleýmettik kómekti úıde tegin alýǵa quqyly jáne tegin ota kimderge jasalatyndyǵyn jazǵan edik.

Sondaı-aq memleket kepildik bergen zań kómegin kimder ala alatynyn da jazdyq.