Mıanmada salmaǵy rekordtyq 2,2 kelilik qundy rýbın tabyldy
ASTANA. KAZINFORM – Mıanmada salmaǵy 2,2 kelige (11 myń karat) jetetin iri rýbın tabyldy. Asyl tas baǵaly mıneraldar óndiriletin negizgi aımaqtardyń birinen anyqtalǵan. Bul týraly eldiń aqparat mınıstrligi habarlady, dep jazady «MIR24».
Mamandar bul asyl tasty túsi men tabıǵı qurylymynyń sapasyna baılanysty sońǵy jyldardaǵy eń qundy oljalardyń biri dep baǵalap otyr. Rýbın sarǵysh reńki bar kúlgin-qyzyl túsimen erekshelenedi. Sondaı-aq onyń móldirligi ortasha deńgeıde bolyp, shyny tárizdi jyltyry saqtalǵan. Mamandardyń aıtýynsha, tas tabıǵı kúıinde qalyp, eshqandaı óńdeýden nemese jaqsartý jumystarynan ótpegen.
Eldegi eń tanymal asyl tas óndirý ortalyǵy – Mandalaı qalasyna jaqyn ornalasqan Mogok aýdany. Sońǵy onjyldyqtarda bul óńirden birneshe rekordtyq rýbın tabylǵan. Atap aıtqanda, 1990 jyly – 496,2 karattyq, 1996 jyly – 21,4 myń karattyq (shamamen 4,3 keli), al 2022 jyly salmaǵy 2,8 myń karatqa jýyq tas anyqtalǵan.
1996 jyly tabylǵan rýbın eń aýyr tas sanalǵanymen, mamandar qazirgi oljany túsi men qurylymynyń sapasyna baılanysty áldeqaıda qundy dep baǵalap otyr. Baǵaly tasty tapqan adamdardyń aty-jóni jarııalanbady.
Mıanma álemdegi rýbın men nefrıttiń iri kózderiniń biri retinde belgili. Elde tabylǵan asyl tastar týraly memleketke mindetti túrde habarlaý tártibi bolǵanymen, zańsyz óndirý faktileri áli de keń tyıylmaı otyr.
Eske sala ketsek, buǵan deıin Aýstralııada álemdegi eń iri alqyzyl almaz tabylǵanyn jazdyq.
